*

E-kids Alan學做生意 一腳踢賣老火湯

Alan形容係人生一個重大挑戰,一切由零開始。

組合E-kids成員林詠倫(Alan)努力跟未來外父學做飲食生意,最新動作係跟女友的家人一齊投資外賣老火湯店,由揸咪轉揸湯勺,Alan形容係人生一個重大挑戰,一切由零開始。

林詠倫同女友及未來外父合資老火湯店,馬上請E-kids成員Tim試飲花膠鮑魚雞湯。

林詠倫的老火湯店開業當天,隊友Tim和張立基挺身力撐,Tim仲改《開始戀愛》歌詞贈慶,加入冬菇、花膠等食材入歌詞內,相當搞笑。Alan話Tommy做咗大忙人嚟唔到,但會屈他買湯券支持吓。Tim見到兄弟有新的開始都戥他開心:「尤其家我哋呢個層面係難搵食嘅,除非可以做到陳奕迅、容祖兒咁收入穩定,如果只靠出show錢真係好大件事,自己都試過好冇錢嘅日子。我哋可以唔放棄娛樂圈,但要喺出面建立事業,要多方面發展。」

做埋外賣仔送貨,乜崗位都要做得到。

由零開始學起
雖然喺飲食生意上只係做「學徒」,但Alan形容新店開幕時開心得似做新郎哥一樣:「跳得舞多手腳都會勞損,所以向經營跳舞學校的Tim取經學吓做生意,對我都係個挑戰,由解凍、買料、斬雞、落料,甚至送外賣都要做。初時壓力好大,怕唔知醒起身,家一早五點半起身學煲兩款湯,以前五點半都未瞓啦,尤其未做過煮飯嘅人好吃力,試過燙到手指起水泡都唔知,以為係畀花膠黏住手指呀!但煲到足料靚湯好有成功感,女友最開心,因為以前我好似少爺仔咁,家變身暖男。」他又強調只係小股東,經濟上唔使靠未來外父。

Alan似足學徒咁乜都要落手落腳去做。原來連食材解凍都係一個學問。

Alan燙到手指起水泡都唔知。

郁禮賢經營跳舞學校之餘,平時係湊女公。

林詠倫開老火湯店,組合E-kids隊友郁禮賢(Tim)及張立基到賀。