*

黃澤鋒囡囡半歲勁醒 唔想她性格霸道 籌備追多個

踏入鼠年,澤鋒首要想搵錢!

豬年對黃澤鋒和太太陳麗麗絕對是興奮的一年,因年中誕下金豬B女熙恩(乳名小黃妃),雖然過程驚險,但小黃妃愈大愈精靈,半歲人仔已識得做「give me five」,亦相當有性格,這天影賀年全家福太倦,即時發脾氣唔睬媽咪,但cute樣足以冧暈全場。正因囡囡勁醒目兼萬千寵愛在一身,澤鋒和太太好擔心她會持寵生驕,性格變得霸道,鼠年會開始計劃為她添個細佬妹,所以新一年兩夫妻首要願望就是全家人平安健康,澤鋒工作機會更多,搵定下胎奶粉錢。 

黃澤鋒與太太陳麗麗表示鼠年會開始計劃為囡囡添個細佬妹。

面對武漢肺炎疫情,澤鋒和麗麗去拜年時都會特別小心,「盡量唔去啲人多嘅地方,同埋自己抱埋身唔坐BB車,仲會自己揸車唔搭車。」

早兩日種了疫苗唔多舒服的小黃妃,換完第二套衫再影,已倦到冇乜心機。

對於過去的豬年,澤鋒過得相當滿意,「冇諗過年頭忙到年尾,真係好托賴,最開心梗係囡囡出世,我哋唔係好特別嘅職業,只係教拳同教游水,仲有戲拍,又生埋個女,原來豬年幾利我喎!哈哈!」麗麗認為小黃妃的出現令人生改變,她轉型做全職媽咪,「有咗小朋友成個生活同作息都唔同晒,每日都希望爭取時間同佢一齊,因為佢日日都有變化,好似佢之前唔認人,呢排會望真先肯畀人抱,又變得好黐身,我哋喺屋企就唔可以離開佢視線。」

見到利是小黃妃搶住要,澤鋒笑言:「蝕咗咁多年,今年有機會回番少少本啦!」

咗好耐,小黃妃先肯勉強「畀個5」媽咪。

但做完即轉身攬住嗲哋投訴。

囡囡大得快,澤鋒不想錯過小情人成長,麗麗爆他工作之間有少少空檔都攝返屋企睇B,「佢搵阿女义電,係佢精神支柱嚟,阿囡又好醒知佢返嚟,就會扭佢㗎!」這天影相,小黃妃好識望鏡頭,麗麗忍唔住爆,「佢最鍾意望鏡頭同影相,演戲仲叻過爸爸,唔畀佢食手指佢會扮嘢。」澤鋒說:「佢好識諗橋好古惑,咁細個都識得投訴,所以佢救命就搵老竇,阿媽係執法。」影相時因要快速換衫,被媽咪舞完一輪的小黃妃相當不滿,一度嬲豬唔睬媽咪,平日好叻「畀個5」的她,即係扭計唔肯做,麗麗都笑言:「佢好有性格,不過係好事嚟嘅。佢骨頭都硬淨又有力水,身體機能都幾好。(大啲可以學拳同游水?)我哋會強制佢學,因為游水係求生本能,而佢又係女仔學拳可以保護自己,但佢將來做咩我哋好開放,只要唔係三分鐘熱度就得。」澤鋒就補充,「家年代唔同咗,好多嘢都冇得迫,佢家6個月都咁有性格,6歲咪不得了。」

過年前,澤鋒一家三專登快閃台北幾日辦年貨。

去年10月,澤鋒和麗麗為7月出世的小黃妃舉行百日宴,筵開50席。

超得意的小黃妃出浴照,真係引死人㗎!

踏入鼠年,澤鋒首要想搵錢,「搵多啲錢,等生活再好啲,展望下年希望大家和平和諧,樣樣嘢都順暢,屋企人最緊要齊齊整整就放心。」麗麗就話:「佢都好辛苦,希望佢有健康身體先可以搵錢,所以成個家庭都要健康。」原來鼠年他們更有意為追多個準備,麗麗說:「最初諗住要一個就算,但當佢一個嘅時候會驚佢悶。(澤鋒:同埋驚縱壞,所有嘢都好易得到,以為理所當然。)又唔識得分享,個人更加霸道。」雖然麗麗發現52歲生B,已不算高齡產婦,但想要下一胎一樣要養好身體,「診所啲姑娘都話有啲大過我都生到,但係如果再有,身體要keep得更加好,做好調理,因為呢胎都傷,要keep住睇緊啲飲食,因為我仲餵緊人奶,要keep得好好,做番多啲運動,最緊要身體機能好。」

澤鋒對住小情人成個冧晒,返到屋企第一時間抱。

麗麗早前抱小黃妃種疫苗,網友重點放在她的小肉腿。