*

姚子羚呻疫情停Job冇仔埋身 張兆輝晚晚老婆撐枱腳

輝哥:相信好女仔一定會遇好男人。

二月十四情人節,於TVB劇集《黃金有罪》中飾演情侶的張兆輝及姚子羚約埋去貝沙灣一間酒店共晉法式情人節下午茶餐,兩人挽手漫步草地,Sweet到爆!自爆專情但不浪漫,近年才懂送花冧妻的輝哥笑說:「劇入面我為咗要實踐對前度楊卓娜嘅承諾,所以犧牲咗情人知己,我對晶晶(姚子羚)唔住,唯有補返數啦!」經歷過愛情大風浪的子羚大讚同輝哥一齊好好feel,還會以輝哥同輝嫂做藍本,只求一段簡單快樂但細水長流式嘅愛情,只可惜還未遇到!

筍盤輝哥 姚子羚揀男友一定要似輝哥,還好羨慕輝哥、輝嫂式相處,一份細水長流的愛。

張兆輝、姚子羚、蕭正楠及洪永城主演的TVB劇集《黃金有罪》大結局,劇情高潮迭起,大家都關注張兆輝飾演,壞事做盡的「榮木桐」收場。而輝哥跟姚子羚就擦出不少火花,尤其後者讓愛,爆喊主動提出分手一幕,兩人演技獲讚,子羚說:「輝嫂話分手嗰場戲睇咗40幾次,呢場戲我都好鍾意,好多朋友話睇到心都塞,有愛不能愛嘅痛,其實晶晶冇怪過Gordon,佢知道Gordon一直等緊未婚妻返嚟,而且見對方坐輪椅,男人在情在義,應該要照顧佢。」輝哥就話演這場分手戲,其實在男人視覺都是心痛,內疚,無奈的:「如果現實生活中有呢啲情節,哈!我諗要開三人會議嚟解決,我作為男人唔想享齊人之福,因為有一個女人都要做好多嘢,兩個咪更煩。更何況我咁木獨,冇錢又冇型,唔會有狂蜂浪蝶埋身。」對此,子羚大笑:「係呀!我都係因為《黃金有罪》先埋身。」

呵返賠罪 張兆輝為「榮木桐」向她賠罪。

除了分手戲,輝哥對浪漫共舞那場咀戲都好鍾意,「最深刻同子羚喺街上共舞,喺月亮前Kiss,畫面好浪漫好靚,好有mood,應該係近年最喜歡的愛情場口。」劇內,姚子羚雖然深愛輝哥,但都揀了錢進(蕭正楠),劇外,39歲子羚經歷過愛情大風浪,擇偶心態有所改變:「因為榮木桐背景太複雜,愛得好辛苦,付出好多,相反錢進人生簡單。人大咗想要細水長流嘅嘢,雖然係平淡,但無風無浪係福份,係一輩子想要嘅嘢,兩公婆你笑吓我,我笑吓你就一世,好似輝哥、輝嫂一樣,我見佢哋好有默契。」

見到都甜 兩人共晉甜到入心的法式情人節下午茶餐,以醉人的酒紅色為主調,包括朱古力蘸甜酒士多啤梨、紅桑子馬卡龍、櫻桃青蘋果慕絲蛋粉等。

問子羚現實生活中有冇比較簡單的男仔出現?她說,「希望有,有就即殺!」再問有沒有人追?她即說,「家非常時期大家留守屋企少咗社交,工作都受阻延,何況係感情?我連屋企人都少見,非常時期只係想快啲搵錢,大家盡快重回正軌,因為少咗好多商演。」輝哥大讚子羚是好女仔,可養精蓄銳,相信好女仔一定會遇好男人的。

輝哥有禮 輝哥好有風度,扶住着高踭鞋的子羚行出行入。

至於在疫情下,輝哥可會少了同輝嫂Sweet?子羚搶著說:「其實食飯都會傳染病毒喎,都唔使講到有冇親密接觸啦!」輝哥形容兩公婆日日都是情人節:「家得返我哋兩個撐枱腳食飯,晚晚佢都坐我對面。」

月下Kiss 輝哥形容月光下Kiss是近年的代表作,因為好唯美。

車撞吐血 張兆輝欲搶回掌握在姚子羚手上的證據時,令她於混亂間被車撞倒,血流披面兼吐血,觀眾愈睇愈肉緊!

簡單的愛 子羚希望現實中的另一半好似錢進咁,只求伴侶快樂,一份簡簡單單的愛情。

索爆中女 子羚水著look索到噴血,不乏裙下之臣吧。

舊愛現身 舊愛楊卓娜蒲頭拆散鴛鴦,作為新歡的子羚笑說:「錯就錯在阿Noon點解要喺呢個時候出返嚟。」