*

胡慧冲拍片緊貼曼谷封城實況 佛寺買布口罩做善事

居泰港人胡慧冲(Roger) 自發每天在自家YouTube頻道推出「居緊三十」節目。

泰國政府為進一步控制新冠肺炎疫情,上星期公佈了由4月3日開始,全國會進行宵禁,時間是晚上10時至凌晨4時。居泰港人胡慧冲(Roger) 自發每天在自家YouTube頻道推出「居緊三十」節目,update曼谷市面狀況獲網民讚好,得到鼓勵的Roger話會繼續緊貼報道,等熱愛泰國的港人能夠知多啲。

一向好繁忙的街道Silom Road在宵禁後人流極少。

曼谷最熱門景點「四面佛」亦關閉至4月30日。

曾經主持過亞視資訊節目《今日睇真D》的胡慧冲自言職業病發作,所以每日不辭勞苦四出報道曼谷實況。除咗喺晚上十點宵禁前拍片講吓當地狀況外,朝早仲會去遊客打卡位睇吓:「唐人街人流大減,唯獨喺疫境下賣金套現嘅人就好多,所以金舖最旺場!至於大皇宮人車疏落,四面佛亦已關閉,翟道翟市場暫時休業,商場及百貨重門深鎖,只有超市如常運作,都有小小搶購潮。」Roger的報道被網友大讚好有心,叫他加油!他卻說都係因為心癮起啫。

戴住佛印口罩的胡慧冲在冇船往來嘅昭拍耶河前影相留念,他表示絕對係奇景。

當地餐廳只能外賣,喺等候區等候都要保持距離。

一罩難求

胡慧冲表示當地亦一罩難求,有見及此,泰國佛寺推出唔同顏色兼有佛印嘅布口罩,但強調戴咗唔會百毒不侵,他提示說:「根據師傅所講,佛印布口罩只係一個信念,目的係想大家光顧吓佛寺,踴躍捐輸,收益用嚟捐畀窮人。其實大家都要小心健康,多啲洗手及戴口罩,唔好走入人群中以身示『法』,否則神都幫你唔到呀!」胡慧冲否認係寸爆提倡「口罩加持法」抗疫的李居明,聲稱完全係兩回事,又話為咗做善事,他都訂購咗5個,每個69泰銖(約17港元)。

胡慧冲去咗曼谷唐人街直擊市況。

一度傳出泰國將會改為24小時宵禁,胡慧冲買咗小量零食及乾糧做好準備。

胡慧冲跟泰國人冬蔭妹一齊做嘅J2旅遊節目《冲遊泰國》好受歡迎。