*

upload_article_image

前世情人黐到實 老婆呷醋向陳柏宇「開拖」

老婆發嬲,非同小可~

符曉薇話羿辰未瞓醒就叫爸爸。

「晒B狂魔」陳柏宇(Jason)經常拍片分享妻女生活點滴,昨天趁出街前又開live,片中老婆符曉薇嬲嬲豬話not happy、好hurt!原來係玩呷醋。Jason趁老婆行開咗,就細細聲爆料話因為歲半大嘅「前世情人」陳羿辰成日叫住及跟住爸爸,搞到老婆冇晒癮。

連換衫都要爸爸哄。

接近半小時短片中,陳羿辰的確黐到Jason實。跟住爸爸入洗手間刷牙、去衣帽間等,仲坐埋爸爸大髀陪爸爸搽cream、甚至換衫都要爸爸哄…符曉薇多次叫BB過來都被拒,她無奈說:「好灰呀,放棄,以前羿辰喊住要我抱,家未瞓醒就叫住爸爸,做乜都要爸爸抱…」當化緊妝嘅符曉薇聽到房外Jason叫羿辰big hug爸爸,她帶點忟憎,大大聲說:「唔好再搞呢啲嘢!話你聽,你要同佢冷淡啲呀!」又指控Jason成做好人角色,Jason反駁話唔係:「唔係喎!尋晚食飯我鬧到佢癲喎!」符曉薇即說:「你食...啦!呢啲唔係鬧,仲喺張床同佢玩,佢個樣幾輕佻浮躁呀!」

兩父女好開心呀!

阿女黐住爸爸,符曉薇感到好灰。

符曉薇再有感而發說:「你哋叫我追多個囝,萬一唔小心又係生個女,佢哋三個黐埋一齊,得返我自己一個咁我咪好灰?家我女又冇,又冇地位,動力資源只係買嘢,唔買嘢做乜?」

老婆唔畀陳柏宇同囡囡擁抱,唯有抱返佢入房。

她又再爆料:「我老公話要隊冧我,因為我係屋企最大使一個,佢話請多兩個姐姐仲平過我!」Jason見老婆火火地則加以安慰:「其實我只係用經濟角度出發,以人情同愛嘅角度,梗係唔會咁啦!阿囡唔係唔要你,佢瞓覺時需要你!」

冧妻成功,老婆笑返喇!