*

「肥胡」成針對焦點 早已公開受訪 唔知申報乜嘢

本地檢測能力不足,特區政府急急委聘外界服務,同時又向中央求助,但咁做就犯正部份醫療界「本地至上」的大忌,實行左撩右撩吹毛求疵批評一番。好似本身係私家醫生的公民黨議員郭家麒,發現有份取得政府合約的華昇診中心係上市公司,近日頻頻為加大檢測露面的華昇顧問胡定旭有認股權,就質疑他有份拉線,為何無申報利益。

胡定旭

胡定旭

胡定旭曾經做過醫管局主席,無錯係社會知名人仕,但這已是兩任前的事,之後由梁智仁醫生接替,現在再由范鴻齡做主席。肥胡現在已再無做公職,所以佢一聽郭家麒咁質疑,就真係O哂嘴,都唔知申報啲乜。佢話,自己做得上市公司顧問,有認股權何足為奇,作為上市公司一早跟足規矩做事,無端端就被人質疑,有人仲踩多腳話佢發疫情財。

睇番,肥胡任職的華昇,是創業板公司中國生物科技服務公司,該公司由投資者夥拍科研人員創立。肥胡加入後不時接受專訪介紹公司業務,最近替政府檢測他亦有接受過報紙專訪,根本沒有甚麼秘密,所以亦不怕被人扣帽子。

肥胡平時做人和和氣氣,唔會特別得罪人,今次惹是非,估計一來檢測服務係近日行內的主要收入來源,而且過去市民要做檢驗,不可以自己摸上化驗所,必須由醫生介紹,過程自然要收錢。現在政府需要大量檢測,相關限制帶來的費用就引起關注,令檢測工作變成利益好敏感。

再者,係本地檢測能力嚴重不足,好多市民就要肯付錢都無法及時獲得服務,於是政府向中央求援,上周末內地支援隊已經來港,這也是本地醫界最不想見到的做法,肥胡在過程中現身幫手,自然「篤眼篤鼻」,所以話佢有利益衝突可能已經算係客氣。