*

每周嘆幾粒鐘男人的浪漫 森美張繼聰對老婆一條心

男人,都係有樣嗜好先至唔會亂諗嘢!

啱啱簽咗古天樂公司嘅張繼聰,事隔多年再出新歌《David Harleyson》,仲搵埋一班古董電單車迷如森美等人友情客串,一齊幫手拍MV,寓工作於娛樂。森美同張繼聰志趣相投,亦係顧家好男人,森美同《頭條新聞》講:「駕駛電單車要更加集中精神,訓練到個人有少少冥想狀態,咁就唔會亂咁諗埋啲冇謂嘢!」睇嚟森美舊拍檔細So要學吓揸電單車喇!

張太謝安琪好鍾意坐電單車尾。

日前森美及張繼聰,駕駛深愛嘅Harley Davidson古董電單車享受男人的浪漫,一班車友幾乎每個周日早上都有聚會,飲完茶兜完風,中午12點前就要趕返屋企交人。張繼聰好Enjoy呢幾個鐘頭,因為係屬於中佬嘅自由時間:「一班人聚埋遊車河係一種減壓方式,而且男人去到某個階段要有個嗜好,唔係食就瞓,個人好易走樣。」森美點頭同意,他們更影響到一班車迷變得愈嚟愈健康,大家都想有fit爆身形,可以着住靚衫揸住部車影靚相。

結婚20年,森美對老婆一條心,駕駛電單車可集中精力,唔使諗埋啲冇謂嘢。

電單車「毒」性好強

平日張繼聰為家庭而忙碌,所以要搵方法平衡生活及工作。

張繼聰爆森美有4部電單車,其中一部係用嚟買餸嘅「綿羊仔」,最離譜仲有部「駁腳車」,開去揸其他車,阿聰笑說:「嗱!4部就太離譜喇,我只得3架,而其中一架絕版PS-520係老婆謝安琪送我嘅生日禮物。因為電單車唔貴又慳地方,毒性真係好大。」除咗愛電單車,兩人坦言對老婆一條心,阿聰說:「我老婆咁索,唔使諗出軌,我追我老婆都未追得掂呀!」

一對子女被阿聰感染都鍾意玩小型電單車。

呢部絕版電單車係謝安琪送畀張繼聰嘅生日禮物,特別珍貴。

阿聰寸爆森美,指他揸「綿羊仔」去買餸!

問森美愛電單車多定老婆多,他笑說,不如問老婆愛我多,定電單車愛我多啲?

張繼聰話所有嘢都唔使問淮老婆,唯獨買車就要得到批淮喇!

森美及張繼聰強調中佬一定要有啲嗜好,揸古董電單車就最健康,因為唔講求車速,平日只係遊吓車河,感受吓大自然。

森美笑說:「唔係個個人都好似我哋咁好運,不過,揸電單車都訓練到集中精神,唔會亂咁諗埋啲冇謂嘢!其實寫一部以電單車為題材嘅劇集都唔錯,由開車講人生,疫情下更貼切,唔少人駕車做送外賣。」