*

upload_article_image

屋邨公园捕获准新郎瀡滑梯 陈山聪陪姨甥女玩超有父爱

系爱呀!

陈山聪今年的43岁生日愿望有二,一系剧集《金宵大厦》收得,二系结婚生女。11月1日(下周五)山聪就做“老衬”,虽然未见“双喜临门”,好彩恨做老窦恨到癫嘅佢,准老婆个妹家有得意囡囡芯芯。上周六(19日) 下午四时多,带住黑超,一身潮人打扮嘅山聪带住未来姨甥女去坪石公园游乐场玩,潮山聪返老还童跟岁半嘅可爱芯芯玩足成粒钟,玩晒摇摇船、瀡滑梯同荡秋千,难得山聪乐在其中,较芯芯更开心,而且陪细路女玩时,表现温柔又细心,慈父feel涌晒出嚟,问鼎视帝前可以率先攞个“合格老窦”奖㖞!

山聪揽实芯芯玩摇摇船,玩完一次仲会问小妹妹有无头晕,好甜呀。

生得高大嘅山聪屈住个身陪芯芯玩瀡滑梯玩得好投入,而佣人姐姐亦在旁协助。

43岁陈山聪近日向前妻Ponny爆喊认错,坦承对过去做过嘅事深表后悔,而山聪用了6年时间成功洗底,更凭著《金宵大厦》保安员“阿萧”一角成为网民力推视帝。上周六,山聪偷闲带住穿彩虹裙仔的未来姨甥女现身坪石公园游乐场,作为潮人,山聪去游乐场陪细路女玩都Keep住造型不能输,带黑超,穿烂牛,加埋戒指、颈炼,星味超浓。现场有成50位大人同细路,山聪亲切地跟街坊们逐个打招呼,亦有唔少细路仔粉丝大叫阿萧哥哥,要求跟他合照,如迷你版影迷会。

玩足成粒钟,山聪仲霸埋人哋阿妈角色拖住芯芯走。

当日同行的还有山聪准姨仔及佣人姐姐,却未见未婚妻Apple。而山聪主力负责同芯芯玩,佣人姐姐从后支援,而准姨仔负责影相。43岁的山聪玩得相当投入,全程笑到四万咁口,从后推秋千,又拖小朋友跑上跑落去瀡滑梯,玩摇摇船时配埋音发出BB玩乐声,仲做埋摇摆肢体动作,玩到七情上面,加埋满足笑容,好有爱。玩完一轮,他温柔地问芯芯:“点呀,系咪好晕呀?嗱,你企喺度先。”跟住小心翼翼地扶小朋友企喺度,又抱她坐喺身边再玩,慈父味飘晒出嚟。玩到够皮,山聪仲抢住拖小朋友离开。其间有街坊见他玩得咁Happy,笑住叫他快啲生返个!他即答:“我都想。”

山聪虽然一直赶拍剧,但同芯芯玩完全唔觉攰仲笑得好开心。

对于被野生捕获陪未来姨甥女去公园玩,山聪大笑说:“其实呢期忙紧拍新剧《大步走》好唔得闲,因为我好锡阿妹(芯芯),一得闲就同阿妹去玩,咁啱𠮶日系假期,我又做完嘢,佢妈咪又得闲,咪车佢哋去玩囉。我唔介意喺屋邨公园蒲头,艺人都系普通人啫,同小朋友去玩又唔系喺夜店玩。”对于有小朋友认得佢系“阿萧”,佢答得轻松,“ok啦,我又冇乜所谓。”至于问点解同小朋友玩都要着得咁行?他笑说:“唔关事,因为晚上有约。”

山聪见到芯芯就冧晒,恨生女恨到流口水。

有小粉丝主动埋身求合照,仲真系叫得出“阿萧哥哥”角色名㗎。

下周五结婚的山聪因为仲忙紧拍新剧《大步走》,所以未识紧张。对于姚子羚爆他恨生女恨到流晒口水,他说:“生仔生女都冇所谓,凑阿妹凑得多我钟意女多啲,阿妹真系好得意,而且女仔嗲啲。”另外他亦透露Apple未有喜,所以大家唔使猜测,多谢大家关心。问到恨生女定恨攞视帝?他又大笑说:“唔系有冇信心问题,系仲未有资格攞奖,仲有好大好大进步空间,继续努力啦。”依家的山聪如同《金宵大厦》结局一样命运改变了,对此他说:“跑步令我改变,因为跑步令人变得好正面和开心,开心就自然一切都会好。”

山聪揽实芯芯玩摇摇船,玩完一次仲会问小妹妹有无头晕,好甜呀。

山聪经常在社交网上载芯芯喺公园玩嘅相。