相信熊貓迷已經對「家姐」加加同「細佬」得得日常活動的大熊貓之旅外場展館相當熟悉，而兩姐弟日常休息生活的內場房間就鮮有曝光，今次海洋公園小編就以獨家視角，由「家姐」加加行住Catwalk帶大家去「睇樓」！
IG圖片
海洋公園在社交平台公開「家姐」加加的最新影片，由於視角獨特，好似真係跟住家姐「加加」去搵細佬「得得」咁！一路上，向來儀態優雅的「家姐」加加還不時停下腳步，體貼的回頭望一望，等小編的鏡頭跟上，盡顯大家姐風範。
不過影片去到後面變咗「味道」，原來負責帶大家「睇樓」的「家姐」加加，竟然斷正細佬「得得」獨食盆盆奶，嬲到家姐「加加」第一時間撲過去，「細佬又做(胖)徒自己歎奶！獨食易肥啊」
影片曝光引來網友熱議，大家紛紛爆笑留言：「正 請問可唔可以出集內場room tour 」、「我好鍾意家姐，她今天示範咗怎樣做Cat Walk女王！」、「加加家姐catwalk 百看不厭」、「家姐呢個panda walk，pat pat扭下扭下帶我哋入內場搵細佬好療癒啊」、「加加姐：我行得係咪好elegant呢」、「犯哂規犯哂規丫。。。點解家姐嘅panda walk咁優雅架，盈媽教得好有教養丫」、「最佳攝影，角度速度好掂呀～ 加加姐好似地產 Agent 咁帶我地參加"黄竹坑豪宅" 睇樓團」
萬千寵愛的大熊貓龍鳳胎「加加」、「得得」好食好住好玩，最新消息兩姐弟體重已經超過35公斤！而且，告別BB餐，開始食窩窩頭了，讓契爸契媽既感欣慰，又捨不得兩個寶貝大得太快。
家姐細佬體重超過35公斤啦！香港大熊貓官方專頁ig截圖
家姐「加加」同細佬「得得」已經15個月大，由老鼠仔一樣的BB，長大到現在肥嘟嘟，識得「費媽」，識得打架，又識得撒嬌。
家姐細佬接受護理訓練。香港大熊貓官方專頁ig截圖
海洋公園的香港大熊貓官方專頁最新帖文帶來好消息，家姐細佬有不少成就解鎖，例如接受護理訓練，奶媽吹著哨子，加上手指指示，細佬就懂得朝奶媽方向走去，準備飲盆盆奶；又例如奶媽叫「加加」，家姐聽懂自己被點名，就馬上「應機」，聽明白指示自己走去正確的地方。
家姐細佬接受護理訓練。香港大熊貓官方專頁ig截圖
大熊貓家姐細佬開始食窩窩頭了。香港大熊貓官方專頁ig截圖
家姐細佬每日都探索和學習新事物，在奶爸奶媽、契爸契媽眼中，是越來越聰明和勇敢了。「睇到好感動，但ee唔想你地大得咁快」，「係盈盈媽媽，奶爸奶媽教導有方又有愛心細心，所以兩個寶貝無論身型同學習都進步好多」，「升中學了啦，接受正式訓練了！家姐叻叻！細佬開始食窩窩頭呀，唔怪之得有35kg重呢！兩姊弟加油！各位奶爸奶媽辛苦了」，「身形就嚟追得到盈盈啦」，「奶爸奶媽們準備要抱不動兩姐弟了」。
大熊貓家姐「加加」同細佬「得得」已經15個月大。香港大熊貓官方專頁ig截圖
另外，海洋公園宣布多項門票優惠方案。即日起至12月17日，香港居民可購買「一票雙遊」門票，以成人票價538元、小童票價269元，一個價錢可自由選擇兩個日子入園。由即日起至明年1月4日，推出「二人同行」成人優惠套票，兩位成人票價為915元。今年12月1日至明年1月4日期間，購買兩個或以上「全年會籍」，不論成人、學生或小童會籍，均有85折優惠，即成人年票為1173元，學生或小童年票為833元。
