你以為坐監係渡假呀？！

2025年07月25日

而家放緊暑假，好多人都會去旅行，自由自在咁去渡假。不過坐監唔係放假，梗係有規則要守啦，唔係喜歡住乜嘢房，食乜嘢餐都隨便揀，講到呢度，可以同大家講吓政府最新修訂嘅《監獄規則》啦。

首先，喺香港坐監嘅人主要分為兩種，一種係已經被裁定有罪嘅「定罪犯」，另一種係等候審訊而被還押嘅「候審犯」。而今次修訂嘅規則，就包括禁止「候審犯」食「私飯」，即係由外邊訂的餐，以及限制所有在囚人士不得接受未獲懲教署署長授權嘅人士探訪等等。

「私飯」方面，已定罪嘅在囚人士本身就安排咗食監獄準備嘅飯餸，所以係影響唔到佢哋，而以往「候審犯」可以喺還押期間訂購「私飯」，於是令到監獄裡面嘅黑勢力有機可乘，利用「私飯」進行非法交易，借此收「靚」，企圖擴大自己係監獄嘅勢力。

資料顯示，過往6年間發生咗超過300宗「私飯」引起嘅違紀事件。好似喺2022年農曆新年，就有兩幫具黑社會背景嘅人馬，因為其中一方無兌現承諾，向另一方供應額外膳食，搞到10名囚犯喺赤柱監獄飯堂內打鬥。同時，雖然話就話啲「私飯」係指定供應商提供，但係由接單、買餸、煮飯、包裝到送貨，咁多人經手，即係好有機會出現衛生同安全問題，咁就要懲教署額外人力物力去做唔同檢查，唔通懲教人員要做埋「氣味尚宮」(即宮女試毒)咩！

其實「私飯」唔單止會構成保安同食安風險，價錢仲好貴添，就連啲「手足」都投訴，啲「私飯」好多都只係一餸一菜一飯再加杯嘢飲，就收$150一餐！即使喺港島返工嘅打工仔，平時去中環、灣仔食個Lunch，都唔洗咁貴啦！

有人講過賣「私飯」嘅餐廳每日「私飯」生意額超過2萬4千蚊，成個月生意至少超過60萬。有老友就爆料話，有啲專供俾「手足」食私飯的餐廳，靠搞「私飯」賺到盤滿缽滿，佢哋而家聲稱關心「手足」人權，其實內裡咪又係錢作怪，生意掛帥，似擔心無得再搵「手足」錢多啲囉！

「私飯」又貴又危險，取消都好合情合理。「私飯」制度源於英國，但英國自己本身喺1988年都已經廢除咗相關規定，新加坡、澳洲、馬來西亞同南韓等司法管轄區亦都無「私飯」制度，反對派咁鐘意講外國標準，呢啲就係外國標準。其實懲教署一直都會提供中、西、印度同素食4款餐，有需要嘅話，仲會提供軟餐等30幾款特別餐，就算「候審犯」有唔同文化、宗教、醫療需要，禁「私飯」都絕對唔影響佢哋的飲食營養。好幾年前有幾位前立法會議員探訪赤柱監獄，當時仲係立法會議員嘅「范X威」仲大讚監獄啲咖喱飯有80分添。

至於探訪方面，「候審犯」可接受每日一次探訪，限時15分鐘，每次唔可以超過兩名訪客；「定罪犯」可接受每月兩次探訪，每次限時30分鐘，每次唔可以超過3名訪客。而在囚人士可以登記唔同人成為佢嘅申報訪客。另外，律師、社工、專職教士都可以喺懲教署嘅安排下另外再探訪在囚人士。

但係喺2019年之後，出現咗一啲所謂「探監師」，專門探班黑暴囚犯，呢啲「探監師」同個班在囚人素未謀面，無瓜無葛，點解班囚犯會登記佢哋為探訪者呢？係咪中間有人做咗嘢？佢哋探監有咩目的呢？佢哋係咪收咗錢去探監？高人估計呢啲「探監師」可能想向啲在囚人士，灌輸錯誤同扭曲嘅資訊，繼續洗佢哋腦，令啲「手足」喺監獄入面都繼續憎恨政府。有「探監師」仲串同在囚人士一齊犯法添!聽聞有「探監師」探訪咗近60個三唔識七嘅黑暴囚犯，而一個「探監師」林X儀就自爆喺2019年之後，短短幾年就探咗監幾千次。而林X儀更喺探訪期間，串同黑暴囚犯冒簽文件向警方提出民事索償，最後被揭發兼罪成判監5個月，「探監師」最終變埋「坐監師」。所以，今次修訂規則主要就係要強化懲教署執法效能，杜絕立心不良嘅「探監師」，繼續荼毒在囚人士。

至於在囚人士如果有咩不滿，都可以直接向監獄投訴。另外，太平紳士亦都會平均每兩星期一次，突擊巡視所有監獄，以確保每個在囚人士都有申訴嘅權利。呢班太平紳士，個個都係來自唔同專業或社會界別，好有經驗，所以我零零發相信佢哋有足夠能力，持平咁保障在囚人士嘅權利！

相信大家都認同坐監唔係渡假，收押在囚人士係應該受到一定程度嘅限制。而現行嘅規則已經實施超過70年，世界都已經斗轉星移，況且今次修訂都係審視咗過往嘅相關執法經驗，以及借鑒其他司法管轄區相關法律同實踐經驗，所以修訂規則完全符合國際標準。

連英國都已經廢除咗不合時宜嘅監獄規則，乜黃人唔係好崇拜英、美㗎咩？點解今次又反對修訂嘅？！

鍾情局•零零發

鍾情局

** 博客文章文責自負,不代表本公司立場 **