謠言粉碎：災民安置酒店叫價8000元一晚？消防員冇飯食？

2025年11月28日

大埔宏福苑發生火災慘劇，已確認至少128人死亡，數以千計居民家園被毀。就在全城哀慟之際，網上出現各式各樣的假消息，講到似模似樣。

保安局局長鄧炳強今日（11月28日）下午在記者會上，就提及網上流傳的消息，好多都係假嘅，例如有居民聲稱政府冇提供免費住宿，結果需要住酒店8000元一晚；又有人訛稱是消防員，話裝備不足、冇飯食，要市民提供餐食。鄧炳強就話，呢啲言論是分化社會，希望社會團結一致，唔好俾呢啲想搞亂香港的人任何空間。

講到呢個8000元酒店的case，Ariel都收到一段錄音，內容係關於「我有個朋友」，講到好堅。錄音入面個女人話，政府聲稱酒店免費給居民住，「全部係呃人架！」佢話，有個朋友去到政府提供的酒店，結果發現全部都要錢，去咗沙田區一間酒店，叫價8000元一晚，最後去旺角另一間酒店，都要2000元一晚。錄音仲話，佢哋已經考慮報東張揭發。錄音又強調，佢朋友就係「接受電視採訪的光頭佬」，「死咗老婆同一隻貓，而家個女情緒都好差，我睇過佢地最後對答，真係好灰⋯⋯」

Ariel有印象火災當天的確係有一位光頭男子接受電視台採訪，話老婆被困大廈，不過後來李太證實獲救，被送到那打素醫院治理。但唔係好似錄音咁講，「死咗老婆同一隻貓」。

而這段錄音最可疑的，還不是將個案張冠李戴，而係佢話朋友搵酒店發現都要錢，而且漫天要價。但其實今次需要協助提供住所的個案，係經社會福利署轉介。

至於連日疲於奔命，爭分奪秒與大火搏鬥的消防人員，有冇飯食，都好容易辨認出真假。

高人話，在救災及善後的緊要時刻，無論係出於什麼原因散佈假消息，都好容易擾亂人心、打擊士氣，市民一定要提防這些來路不明的「爆料」，小心有詐！

高人又提醒，除了提防網上假消息，去到現場的熱心市民亦要留心：今日廣福邨平台聚集了好幾百人，當中相信不少都係真心想幫助大埔災民的有心人，但就有人混在其中借分發不同物資聚集起來，有的分發黑口罩，有的開始搭帳篷，有似曾相識的感覺。有心前去支援的市民，小心有被騎劫的風險。

Ariel

** 博客文章文責自負,不代表本公司立場 **