立法會新界西參選人自由黨周永勤昨晚突然在選舉論壇上,宣布停止一切選舉工程,變相棄選,並稱收到一段「狙擊」錄音。相關錄音在網上流出,一把男聲稱要召集2、30人在會場狙擊周永勤「等佢開論壇都無心機為止」,又稱「狙擊完周永勤就大隊著番何律師的背心」。
兩段錄音全文如下:
一、「何律師的意思,8字牌還8字牌,我哋今日有兩個身份,一個身份係市民,係自發抵唔過得頸周永勤同鄭松泰的政治抹黑,手法好不良,同埋嗰3個學運領袖判刑過輕,而何律師提出上訴,要求律政司上訴,而佢哋質疑何律師多管閒事,我哋係發公義之聲,今晚會召集2、30人喺會場狙擊周永勤,等佢開論壇都無心機為止,我哋會咁做。」
二、「我哋狙擊完周永勤之後,就大隊著番晒何律師的背心,就喺現場支持何律師,打氣,散會的時候又狙擊周永勤,個做法就係咁啦。」
新界西8號參選人何君堯今早在電台節目中曾回應有錄音流出,指錄音的男聲是其義工,稱是內部的Whatsapp群組中討論的錄音,論壇開始前已決定取消狙擊的行動。他又質疑周永勤如何取得錄音,「嗰個又唔係對你講的說話,咁大反應作無言的指控,噚晚話自己驚得咁交關,接受新聞訪問就唔想講。我覺得好奇怪囉,如果唔係有人政治抹黑,有人串謀嚟做呢啲非法行為,包括竊聽等等,好奇怪囉」。
周永勤和何君堯同在新界西競選,同區其他候選人包括黃潤達、尹兆堅、高志輝、鄭松泰、鄺官穩、田北辰、梁志祥、郭家麒、黃浩銘、李卓人、黃俊傑、麥美娟、馮檢基、陳恒鑌、張慧晶、呂智恆、湯詠芝和朱凱廸20張名單。