劉愷威同太太楊冪，雖然不斷有傳感情亮起紅燈，但兩夫妻對佢哋寶貝女小糯米就錫到燶，無論幾忙都好，兩公婆都一定抽出時間照顧囡囡。早前劉愷威就做廿四孝爸爸，親自去到小糯米就讀嘅銅鑼灣一間幼稚園湊女放學，期間劉愷威仲同班家長太太團有講有笑，明顯係熟手「帶子洪郎」。
劉愷威一唔使開工就返香港，仲會做「湊女公」，去到小糯米嘅幼稚園接女放學，去到連啲家長太太團都同佢熟晒，大家有傾有講。
劉愷威同其他家長一樣，喺門口排隊等接囡囡放學；期間，佢仲熱到出晒汗要除帽兼狂飲水。
《東周刊》拍到劉愷威早前親自去到小糯米就讀嘅銅鑼灣一間幼稚園湊女放學。佢一早去到校門口，同成班家長一齊排隊等湊女放學，可能因為佢去湊女去得實在太多太密，見佢同成班家長太太團已經熟到有講有笑，仲一邊排隊一邊猛講湊女經添。
親自入埋學校接小糯米嘅劉愷威，一臉慈父樣，果然錫女錫到燶。
小糯米精靈又活潑，一放學即似「甩繩馬騮」，用力甩開嫲嫲隻手亂跑，劉愷威惟有喺旁邊勸阻。
雖然劉愷威喺國內係當紅嘅一線小生，仲行開靚仔偶像派路線，但為咗囡囡着想，不惜拋頭露面同啲家長太太打好關係，可謂紓尊降貴，確實好難得，佢嘅愛女之情真係無容置疑！
