豬視妹姑媽好有心，每年都送來幾盒月餅，又邀請我哋食餐好嘅做節。早兩日見豬視妹拎住一抽二褦，就知一年容易又中秋。

除咗食月餅、玩燈籠、煲蠟同賞月，中秋節最重要活動係咩？之唔係買六合彩囉！中秋節有金多寶嘛。

《飯戲攻心》宣傳團隊醒呀，居然諗到將電影同金多寶connect，提示觀眾呢套2022年賀歲片，改咗喺中秋節檔期上映。

依家只要購買9月7號開畫日嘅電影戲飛，就可以獲得《飯戲攻心》中秋金多寶大抽獎獎券一張，有機會抽到價值10萬蚊嘅足金金條、價值8萬蚊嘅足金金粒，同埋財神金牌等等。有戲睇又有獎抽，Super啦！

有人話劇組揼本，霸戲哥就覺得都係gimmick嘢嚟啫，反而係誠意可嘉至真。你要知道成個event最麻煩應該係申請博彩牌照嗰part，淨係填form都搞餐懵，仲要同政府部門來回周旋交涉，冇番一頭半個月籌備係冇可能搞得成。

陳詠燊導演一向多計仔，唔知中秋金多寶呢條橋係咪佢度呢？以後過時過節，端午就睇《逆流大叔》，中秋就睇《飯戲攻心》，都咪話唔盞。




霸戲哥

** 博客文章文責自負,不代表本公司立場 **