話說焚焚某年生日前，前男友問我想收咩禮物，我話想收石頭。前男友問:「咁你想要鑽石定鋯石？」對於從未收過石頭嘅焚焚頭上一堆問號，就問:「有咩分別架？」前男友以一副堅定嘅目光望住我同我解釋：「拿鑽石就鑽石啦，貴嘅；而鋯石呢，都係鑽石嘅一種，不過就平啲！」
焚焚聽落覺得有少許唔對路，所以最後揀咗鑽石。可能你會話：冇嘢呀焚焚！齋聽個名都知係兩樣嘢，條友擺明想昆你啦！你唔係咁都信呀？拿！由於當時拍拖嗰陣前男友同自己嘅年紀都有一段距離，而嗰陣嘅我係屬於懵盛盛，入世未深嗰類，佢講乜，我就信乜，所以我當時係完全冇質疑過前男友講嘢嘅真偽。
嗰陣互聯網未去到咁成熟（未有smart phone啫，唔係56k年代！！），網上面仲未有好多關於鑽石嘅資料。對於啱啱出尼做嘢但又未會自己買首飾戴嗰陣嘅焚焚，對寶石嘅知識真係一無所知。你唔會敢入去金鋪運吉問鑽石同鋯石嘅分別家嘛！到當我讀咗珠寶課程同入咗行之後回想番起呢件事，喺度諗如果嗰陣時有人教倒我就好嚕！
如果當時揀咗鋯石，焚焚周圍炫富同人講話男朋友買咗粒鑽石比我，而又有人知道我呢粒其實係鋯石的話，就會比人話我戴假嘢充大頭鬼，到時真係瘀到爆。你話如果我知道呢粒係鋯石就話啫，但送粒鋯石比我當鑽石，焚焚覺得好老土！點解咁肉酸嘅事都要話比人聽呢？就係唔想絲打好似我咁比人呃！
最近發現咗網上面有間賣莫桑石嘅網店，佢個post係有條片揾支鑽石筆隊粒石落去，支鑽石筆有反應，跟住喺個post度括住話可過鑽石筆，好似有意無意話緊粒莫桑石等於鑽石，或者係鑽石啲fd子，宣傳手法有點不正當同有啲誤導。你知道呢一粒係莫桑石，買係冇問題，但比人誤導莫桑石係鑽石，就有問題。
可能你會話！喂焚焚！你自己肉眼都好難分得出啦！仿鑽平咁多，人地鬼知咩？拿！焚焚嘅概念係，你買咩，就要同人講咩，唔係叫你大大聲同人講呢粒唔係鑽石，之不過你買緊個a貨箍肚臍袋嗰陣，你唔好同人講你係用真嘢個價錢買番尼囉！莫桑鑽同泛美鑽並不是天然鑽石！波蘿油裡面亦都唔等於有波蘿！只係起呢啲名嗰陣商品說明條例未實行咋！鑽石賣到咁貴，當然有佢嘅原因啦！
點樣知道呢粒係鑽石！簡單尼講。根據香港法例，售賣叫「鑽石」嘅礦石，必須乎合某幾項嘅條件，而呢啲條件，係冇可能用合成方法做倒晒，換句說話講，如果佢唔係賣緊鑽石的話，就必須註明係合成石又或者係邊類嘅礦石！如果你係收禮物嗰個，就睇張證書印有鑽石（如果係合成的話，會有synthetic嘅字樣，見圖1網絡圖片），而個證書冧把同粒石腰印住個冧把係一樣的話，粒石就係鑽石，咁點樣先睇倒個冧把呢？就入求其一間金行話想睇個證書冧把啦！
今次就講住咁多先啦！焚焚之後會慢慢解釋咩係仿鑽，同埋會講下其他寶石，等絲打們豐富呢方面o既知識！我地做絲打嘅除咗扮靚要叻之外，一啲寶石嘅基本知識一定要有！！如果喜歡焚焚寫啲嘅嘢，就唔好吝嗇你地嘅like，你地嘅支持就係我嘅動力。想知多啲有關珠寶嘅嘢，可以去《焚焚的珠寶鏈尾生涯》度睇下！如有咩想問或想我寫的話，留言比我！盡量滿足大家。好吧！我地下星期一見！
PS． 文章最底有個評分架！拍爛檔幫我like 一like丫～～！！
*帶定頭盔：本人意見並非所有業內人士之意見，如有得罪，敬請原諒。
焚焚
** 博客文章文責自負,不代表本公司立場 **
