麥明詩認婚訊後首現身。
32歲「十優港姐」麥明詩早前被爆跟飛機師男友盛勁為結婚,1月底兩人在IG證實喜訊,不過最令人意外的,原來是麥明詩主動出擊向男友求婚,並送上求婚名錶!今日(3月1日)麥明詩出席護膚品牌活動,幸福寫晒喺塊面度!
被問到向男友求婚一事,她說:「好緊張,體會到好多男士做呢樣嘢時有好大壓力,我自己經歷過,可以為對方去做一件事係好感動嘅!」對於未來老公,麥明詩笑言滿意,認定他是可以一起終老的伴侶:「佢個人嘅優點就係思想簡單,好多嘢唔會諗太多或有意見,我哋都相處得幾好!我自己都好欣賞佢,佢好堅靱,人生經歷一啲低潮都可以保持一個好正面嘅心理狀態,呢樣嘢比起其他嘢更加寶貴,因為人生總會遇到好多估唔到嘅高高低低。」
講到決定結婚,麥明詩自言是個有效率的人:「人生有好多嘢要做,有啲嘢開始咗就最好一氣呵成,搞結婚搞得太耐會有好多事發生,所以我秉承我嘅做事方式快靚正就最好啦!」至於造人大計,麥明詩則說:「又唔可以話趕嘅,咁太大壓力啦!不過都想趁年紀未係太大就生,主要係阿媽都鍾意湊,我覺得我一定冇佢咁識教。」
麥明詩透露婚禮於3月底舉行,地點容後會公佈:「喺香港搞,到時再通知!」她又指婚禮不想有太多繁文縟節:「唔係要返傳統,反而想Focus喺賓客上面想佢哋開心。同埋唔好悶囉,因為我成日覺得啲婚禮都好悶。」至於姊妹團人選,她笑言:「靚嘅索嘅,靚過我唔緊要,我覺得係女團效應,佢哋嘅靚同同我嘅靚係會互相襯托!」