有食客到旺角連鎖酒樓慶生，驚見侍應端上「報紙炒豆苗」，更有大大隻曱甴周圍爬，非常離譜。
(FB圖片）
該食客於Facebook群組「飲食黑店大全」發文，表示日前到旺角某連鎖酒樓食晚飯，為家人賀壽慶生。「本來開開心心」卻遇上服務態度極差的侍應，不僅上菜「趕頭趕命」，更要求客人自行擺碟「走到埋枱就咁遞俾我哋揸住，自己安排位擺」。
（FB影片截圖）
樓主表示明白當日「人多爆場」，所以都盡量儘快吃完，但當要求侍應「收一收碟，清一清張爆晒嘅枱」時，對方卻只回應「我傳菜㗎咋喎！」之後樓主又問侍應「有冇人負責收嘢？」對方繼續以事不關己的態度回應「唔係我喎！」然後轉身離開。樓主氣憤表示「態度真係差到冇人有」。
（FB影片截圖）
更離譜的是，當侍應端上一碟炒豆苗時，豆苗內竟夾雜着一角報紙「豆苗食食吓，夠膽死食到有報紙」。再向隔離片皮鴨枱一看，更有一隻活生生的曱甴在遊走「我明白食肆有小強好平常，但都唔係一路有師傅片緊鴨都可以由佢咁周圍走吓嘛？」樓表示整餐食到一肚氣，不會有下次「如果喺街邊食茶記大排擋我可以接受，但係連鎖酒家可以有d咁嘢發生我真係嘆為觀止」。
帖文引熱議，不少網民指出該酒樓質素每況越下「呢間近年好少去，出名劣」、「出名差，去之前都唔問下人睇下評價，冇人幫到你」、「以前幾ok 架，都唔知點解越做越衰」、「少咗去飲茶或晚飯，因為大部分嘅酒樓服務真係好差！」、「近幾年，無論出品，基本服務，落差極大，可以一讚的是，趕客一流」、「今時今日仲幫襯xx，真係食你唔死皆大歡喜」、「已經black list咗，三年冇幫襯過」。
帖文來源：Facebook群組「飲食黑店大全」
