好開心焚焚開咗呢個專頁之後，可以揾倒咁多做珠寶，同愛珠寶嘅朋友仔。亦都收倒對珠寶好奇嘅朋友仔，咁答得倒嘅焚焚會盡量答，但畢竟焚焚入行尚淺，只有四年幾五年嘅時間，答唔倒嘅焚焚會幫你問人，然後解答你，只要你比時間我。今日想同大家分享我對4C嘅睇法。4C，係鑽石嘅評級嘅四大元素。包括重量，顔色，淨度，車工。而呢啲元素你可以當佢地係女人優點咁睇，身形呀，樣貌，性格，學識呀咁（當啦(￣▽￣)）睇一粒鑽石靚唔靚唔可以斬件尼睇，要綜合晒所有嘢尼睇，啫係好似女人唔可以齋睇樣，唔係識倒件絕世港女執倒都喊三聲！而呢啲條件究竟邊樣重要啲呢？其實樣樣都重要嘅，今次焚焚會講下對4C 嘅睇法。
重量
呢個原則上尼講係最標準嘅準則。佢係用實驗室嘅電子磅，準確度係去到厘位，不過亦都有外來因素令到電子磅存有誤差。電子磅佢非常敏感，只要風吹一吹，或者郁一郁，都會影響個重量，雖然個磅係有嘢隔住 ，但如果有人行過佢都會郁一郁；另外就係磅差，亦即係我個磅同你個磅都存有0.001嘅差異，我諗個概率好似戴dom發生意外嘅機會咁囉！即係其實都影響唔大。
顔色
焚焚覺得呢一個係好準嘅準則，畢竟呢個係好影響價錢嘅主要因素之一。點樣評一粒鑽石嘅顔色呢？就係用比色石喇～！比色石你當係類似色辦嘅嘢啦！有廿三粒（應該冇計錯掛）D色到Z色嘅鑽石辦喺度做顔色標準，比你慢慢咁對，亦都因為有準則，所以如果你唔係色弱的話應該錯極都有個譜。焚焚覺得最難係半色，即係好似介乎E色頭同D色尾之間，究竟grade佢咩色好呢？因為始終都係肉眼對，所以存有上下一個色嘅誤差。
車工
之前篇文都介紹過點樣計個車工，某個數值加減乘除某個數值會得出一個結果，再睇番個數值係邊個range，焚焚之前亦都講過，其實好容易就可以去到excellent ，好似計BMI咁，18同24都係標準範圍，即係同一個高度，100磅同120磅都係標準範圍，所以你見大部分石都有3個ex，常見程度就好似勁金歌曲（特登打錯ok？）頒獎禮啲豬肉獎咁，所以焚焚覺得呢方面都幾流灘。
淨度
講到最流灘嘅焚焚覺得就係淨度，雖然GIA有一套壟統嘅準則話比你知應該點grade石，例如vvs的話枱面要clear同唔可以有feather（羽裂紋） ，但如果grade啲中間嘅grade好似vs到si的話就有好大嘅討論空間喇，因為每個人把尺都唔同，你覺得呢粒係vs2咩？焚焚覺得佢係si1喎；你覺得側邊啲cloud好礙眼咩？我覺得枱面條feather仲「銀」眼喎！所以如果budget有限的話，不防喺啲低一至兩個淨度揾下，話唔定有驚喜。
今次就吹到呢度啦！如果喜歡焚焚寫啲嘅嘢，就唔好吝嗇你地嘅like，你地嘅支持就係我嘅動力。想知多啲有關珠寶嘅嘢，可以去《焚焚的珠寶鏈尾生涯》度睇下！如有咩想問或想我寫的話，留言比我！盡量滿足大家。好吧！我地下星期一見！
帶定頭盔：本人意見並非所有業內人士之意見，如有得罪，敬請原諒。
PS． 文章最底有就個評分架！拍爛檔幫我like 一like丫～～！！
焚焚
** 博客文章文責自負,不代表本公司立場 **
