天文台話今個禮拜會跌穿二十度呀！雖知道天文台呢家嘢，信佢一成都雙目失明！之不過為咗各位鏈尾嘅健康著相，係時候有要摷番啲冬天衫出尼喇！皆因焚焚經已賴咗嘢！喉嚨痛加咳，鼻水兼鼻塞⋯慘慘⋯好吧！言歸正傳！貴為鏈尾嘅焚焚當然咩位都要做，茶水姐姐都有權點我嗰隻，今次我想同大家講下自己做過嘅其中一個崗位——分石同配石。
首先講分石，分石就係將鑽石分門別類，同顔色同大小同形狀嘅石分類，方便第時需要用到某種石嘅時候可以好快揾出尼配倒石比廠，咁當然用最平嘅價錢買最靚嘅石亦都係主要因素。通常鑽石買手同呀差買咗一包圓石番尼，一個範圍咁買，當2份樓下要一百卡圓石咁，咁焚焚嘅工作就係喺呢包石裡面，揀番買手同呀差傾好嘅rejection 石出尼。例如40%咁，一百卡嘅鑽石就揀四十卡唔靚嘅石比佢，有黑屎，崩花爛裂咁，再將其餘要嘅石根據大小分番開。
唔好以為好容易呀！查實都幾累！累係累在揸夾鑷揸得耐會累，睇得耐對眼又會累，成日維持住呢個姿勢條腰同條頸又會累！有啲鑽石細到成粒砂糖咁真係呼吸都唔敢咁用力，驚佢吹走！仲要可能會彈走添！要揾把間尺喺個地毯度敲打！有時打勁耐粒石都唔肯出尼喎！哇焚焚！講到咁咪好悶囉！其實都係㗎！尤其係你未訓醒或者食飽飯氣攻心嗰時最攞命！不過同你講就話悶，但焚焚鍾意鑽石，所以唔覺得悶囉！分石嘅工作大致上係咁，至於點樣將啲石分成同一大細？詳細嘅就之後再講。
到配石，呢個就簡單得多喇！就係將一件貨所需要嘅石配出尼比廠做貨！因為焚焚做嗰間公司主要係用電腦軟件設計珠寶，所以通常都有埋所需鑽石嘅資料好似大小同粒數。有啲就係做咗個銀辦出尼，逐粒石隊落啲爪度去配番啲石出尼，兩種方法有咩好呢？前者就係快啦！但唔係最準確，後者就慢，但準好多，減少大陸呃石嘅情況。
分石同配石嘅你就最能夠即時知道石倉倉存量嘅最新情況。而鑽石嘅倉存亦都係好重要嘅一部分，因為都好睇經驗，入多咗石又會責住咗個倉，可能好耐都用唔去啲石，就會比呀頭話；入少咗石的話仲死！會比呀差食住講唔倒價，分分鐘比平時入嘅貴咗好多，咁啱遇著趕貨冇石上廠的話分分鐘會甩期，到時又會比廠長或者腦細話，所以要拿捏得好係並不簡單的！
今次就講住咁多先啦！如果喜歡焚焚寫啲嘅嘢，就唔好吝嗇你地嘅like，你地嘅支持就係我嘅動力。想知多啲有關珠寶嘅嘢，可以去《焚焚的珠寶鏈尾生涯》度睇下！如有咩想問或想我寫的話，留言比我！盡量滿足大家。好吧！我地下星期一見！
PS． 文章最底有個評分架！拍爛檔比個讚同講得好我丫～～～！！
焚焚
** 博客文章文責自負,不代表本公司立場 **