《金多寶講故事》
第一次拜國師為師，就係學卜卦。前年識左班人，佢地會用手機占卦，睇下揾唔揾得番啲失物，問下間公司請唔請自己。有時見佢地占同一件事，鬥下邊個解卦解得最準。講真，卜卦真係好神奇，頂多解錯，支卦永遠都唔會錯嘅。唯獨我冇份參與佢地，因為我求左佢地好耐，都唔肯教我。我心唸：好叻咩？無意間比我網上見倒國師講有關卦嘅文章，心感懾服，決定拜師學習。
卜卦班為期十個月，共有三個部份。前期我地學左梅花易數。古時啲人見一陣東風吹來三片葉，靈感一到，就已經係一支卦，可以預測將會發生嘅事，呢樣就係梅花易數，唸倒都覺得有型。不過，成個課程最精彩嘅，莫過於我地全班見證破案線索嘅一晚。2016年9月22日晚上8時星期四，國師話：「今晚我地講失物。」見我地冇乜反應，國師語重深長咁話：「當你地要用嘅時候，就知道呢樣野真係好緊要。」講左啲基本概念，一個例子之後，同學仔阿魚忽然舉手，問：「可唔可以揾殺人兇手？」成班同學立即望過去。「我有個空姐同事，三年前比佢男朋友殺死左。」
個班房忽好靜。坐近大門嘅阿魚同學話：「都唔知點解我突然唸起佢（指女死者），頭先一陣風吹埋黎，我就有靈感想問。」聽完我真係呆左。2013年12月，一位26歲年輕貌美的空姐，遭扼斃藏屍衣櫃，同時間佢個男朋友人間蒸發，去向不明。警方亦於2014年7月懸紅30萬港幣通緝其男友。大家都忙於google呢單案件，阿魚立即用手機占卦，然後將卦文抄响黑板。
占卦問題為兇手去向。一支卦由六支爻組成，由最底的初爻順序排上去，最高果支叫上爻。占卜出黎嘅「世」為占卦者，「應」為占卦的目標。第四爻子孫酉金持世，此爻指嘅係占卦者阿魚。而下面支三爻為兄弟丑土騰蛇。第三爻丑土暗動生酉金......睇到呢度，我金多寶呢隻懶鬼平時冇練習點會識解吖，得個睇字。國師神色凝重咁解釋：「騰蛇丑土為去世之人，兄為同事，佢暗動生世，係去世嘅同事想阿魚幫手緝兇。」
全班聽到嘩嘩聲！佛家有云鬼有五通，連鬼都識揾國師幫手！莫非真係有冤魂索命呢回事？我响班房根本感受唔倒死者，但支卦就好似代佢說話一樣。「全卦唯一一個變爻响初爻父母巳火度，即官鬼寅木，佢化父母爻，由初爻跳上頂爻，則係兇手北上逃亡；佢由內卦跳去外卦，則係已經唔响香港。頂爻父母巳火青龍，收埋佢嘅，係一位女性親戚。」兇手顯然能一直逃亡。「捉倒嘅機會係有嘅，寅木為金所剋，所以兇手最弱嘅時間為丙申年（2016）和丁酉年（2017），因為寅申相沖，金亦剋木。」當中國師解釋詳盡，深入淺出，此故事中未有一一盡錄；而全班同學當時連呼吸都特別細聲，生怕聽漏左重要資訊。國師都好感慨呢一晚嘅奇情怪事，話如果可以幫助警方緝兇，咁我地就真係好好好西利。同年10月卜卦班完結後，我地班同學成立左2016年卜卦班whatsapp 小組，當中繼續談論此案件，留意有關新聞。
2016年11月，男疑兇在廣東省被公安布拘捕，已安排押回香港受審。消息指男疑兇窩藏親友家中，因在國內涉及其他糾紛而被認出為香港通緝犯。網上見倒死者惜日同事留言，表示為事件感到高興，死者終於尋冤得雪。忽然間想起解卦當晚，國師一句：「官鬼寅木化出嘅巳火始終生土，個兇手始終係鐘意個女仔。」世事嘅野，好多時响一時之間改變，為人處世，應時刻保守自己，規行舉步，才不致行差踏錯。
*特別嗚謝羅鉑提供當晚支卦*
*關於此案資訊*
https://hk.news.yahoo.com/%E6%83%B9%E9%A2%A8%E6%B5%81%E5%B8…
撰文: 金多寶
#以上內容全為學術討論，如令人感情緒不安，請告之本會，自當刪除。
#Facebook專頁
#香港兔蘆術數學會
#Yahoo #ElleBlog #痞客邦 #微博客 #巴士的報
#玄學 #八字 #術數 #面掌相 #占卦 #文王卦
(圖片來源: 互聯網)
香港兔蘆術數學會
** 博客文章文責自負,不代表本公司立場 **
