上次在記協的三大候選人辯論中,鬍鬚曾可能無預咁多記者質問,答得相當求其。搞到鬍鬚曾離場時記協主持岑綺蘭未關咪就爆咗兩句 :「最hea阿John Tsang,我本來準備了個商務局問題……」上次被評為「hea 」,鬍鬚曾今次出席教協論壇打醒十二分精神,表現有明顯改善。
教協是泛民主場,自然有好多政治敏感問題招呼林鄭,論壇後期火花不斷。有出席問特首做大學校監,政府又控告立法會議員等,製造白色恐怖,問3名候選人如何保障教育界不受白色恐怖影響。
林鄭月娥回答時未有正面回應,借「白色恐怖」發揮, 話她自己最近都成為白色恐怖的受害者,但對自己不要緊,因為她拋得個身出嚟選,就預咗呢啲嘢,但白色恐怖卻影響了身邊人,如近日拍片支持她的「芳芳姐」 蕭芳芳惹來網上抨擊,佢話「 呢種白色恐怖係喺香港社會不能夠接受,不應該容忍。社會應解決這種紛爭,不應非黑即白,一唔鍾意嗰個人,就連佢一公里內嘅人都唔鍾意,都要接受批評,接受抨擊」。
鬍鬚曾後來發炮轟林鄭,話「Carrie,網上留言唔係白色恐怖嚟架。其實最近發生好多事情,大家都知係咩事情,嗰啲先係白色恐怖。很多時網上留言才是真心意見,只為表達意見,並非為狙擊某些人,如果我哋撳住呢啲言論,咁先係白色恐怖」。鬍鬚曾今次作風進取,即時有很多掌聲和應。
林鄭在論壇後,再為她說的白色恐怖解畫,認為用一種令人心生恐懼行為、語言去指摘他人,都應屬白色恐怖範圍。她指參選以來深有感受,強調對她本人攻擊抹黑無問題,但對完全無辜、只想表達看法的人,作出完全偏遠常理、帶個人侮辱性的言語攻擊批評,她質疑這是否社會應該認同讚賞、支持的溝通方法。
現場觀察來自高教界的人士對林鄭明顯有負評。但來自幼師界別就較同情或支持林鄭。林鄭對政策問題十分熟書,對答如流,其他兩個候選人鬍鬚曾和胡國興都難與她相比。
林鄭在政綱提到要大幅增加教育開支每年50億元,用於幼師薪級表、改善中小學教師編制,以及資助高中畢業生升讀自資院校大學學位課程等。現場有不少關於幼師政策提問。
林鄭講幼兒教育問題要盡快做,不是要等特首上任,可以盡快和業界傾,提出具體建議,因為立法會7月之後會休會,如果暑假前訂出優先次序,早啲俾立法會復會後考慮,及早提出撥款申請,否則又要等到下個財政年度先至搞到。她在這方面的進取態度,甚受幼師支持。
Ariel
** 博客文章文責自負,不代表本公司立場 **