《李克勤慶祝成立三十週年演唱會》剛剛揭幕，他邀得鄭秀文（Sammi）擔任嘉賓，全藍打扮的她投訴指克勤連嘉賓所穿的服裝也要管，又指與他做朋友會出賣自己年齡。
《李克勤慶祝成立三十週年演唱會》昨晚揭幕
《李克勤慶祝成立三十週年演唱會》昨晚在紅館揭幕，克勤以8個不同造型示人，換上全紅裝束時，迎來粉藍假髮、全藍打扮的Sammi這位表演嘉賓，二人擁攬後就隨即鬥嘴，笑爆全場。
Sammi指做克勤的朋友會出賣自己年齡
Sammi作狀投訴克勤說：「你搵人做嘉賓都好麻煩，連嘉賓著什麼衫都要管，只准著一種色，我想過著黃色，但唔想成條蕉咁升上來，又唔想綠色成棵菜，原本有套紅色衫都好靚，但無理由同你做兩個利是封，又唔係過年騷，最後決定粉藍色變成支波子汽水咁，連『底橫』都係粉藍色，你話要由頭到尾都係一種色嘛！」熒光幕又播出了二人於1991年合作《浪族闊少爺》的劇照，其中還有咀嘴相。
Sammi以全藍打扮擔任嘉賓
Sammi再投訴克勤指：「這是我拍的第一部電視劇，應該無30年，但好尷尬呀，你的演唱會講明30年，同得你做friend好容易出賣年齡，究竟你幾多歲？」克勤即還擊：「五張爭少少，男人到五張先有男人味，同你那位（許志安）差唔多；你最近都經常和我太太嚮社交平台聯絡，搞笑係你的演唱會，每次她都大肚睇唔到，所以你再開演唱會就講聲，我就要準備一下。」
克勤指每次Sammi舉辦演唱會時，太太也剛好懷孕。
Sammi笑窒克勤：「得唔得呀你？話晒五張，操下先喇咁瘦，哈哈！而娛樂圈最珍貴是大家互相支持幫助的精神，之前我在紅館開騷失聲，克勤第一時間短訊問要不要幫忙，今次克勤沒有綵排直接開騷，我知道克勤好擔心亦有短訊問候。」說罷，二人又再擁攬。
