港航開洛杉磯航班甚有期待 貴賓室新穎舒適

早兩晚在一個活動碰到港航公關阿頭Ming姐，她好似穿花蝴般四圍派咭片，很多朋友聽到她來自港航，都甚感雀躍，紛紛探詢港航新開的美加航線的狀況。好多香港人在美加都有第二頭家，又可能有仔女在英國美國讀書做嘢，都好留意港航何時開那些地方的長程航班。

港航今年已經開通了直飛溫哥華的航班，而洛杉磯是第二條飛北美的航線，將會在12月18日開通，亦是港航首次飛去美國，明年將再開通三藩市、紐約，以及英國的倫敦等直飛航線。傳媒大姐對住Ming姐，話港航價廉物美，她剛剛要去LA，可惜時間是港航開通LA航班之前，她更講起早前有朋友訂了港航飛溫哥華的機位，剛好在優惠時間買飛，只需3,000元就有一張。

之後，大家就你一言我一語，講起港航飛北美的商務客位都是1.7、1.8萬元起步，但對家就要4、5萬，甚至高達7萬元一張，有時中產不是付不起錢搭商務客位，特別長途機飛十幾個鐘，都想坐得舒服些，但大嗱嗱要攞4、5萬元出來，有時都會十分肉痛，港航的商務客位價錢就合理好多。

另一個大學公關阿姐就講起，希望港航快些開通飛倫敦的航線，因為她有小朋友在那裡，很想搭港航飛倫敦。

無搭過港航的朋友經常會誤會，以為港航是廉航公司，其實港航是一間全服務的航空公司，只不過它的機票收費合理，所以讓人誤會它是廉航。

港航新lounge 「遨堂」，餐枱原來是一隻天鵝，非常漂亮

早前Sebastian隨團外訪搭港航，有幸在機場就試用港航的新lounge，發覺不俗。這個貴賓室名為「遨堂」，在機場新翼，自成一角。據港航服務總監簡浩賢Stanley的介紹，入口的橋位視角很開揚，是網友鍾情拍照打卡的熱點，可看到一整片候機大堂的風景。

港航服務總監簡浩賢(右)和世界中文報業協會會長李祖澤(左)合影

港航貴賓室有後起之秀的優勢，整個設計比較現代新穎，如果其他航空公司的貴賓室屬於相對沉靜豪華的類別，港航就充滿較為年輕、環保、跳躍的文化氣色。我就對它有一排僻靜的小睡卧間特別有興趣，很多時搭飛機會早到機場個多小時，可以在此小睡，中午來一個power nap，特別醒神。它有些看電視的座位都甚有特色，頗有自成一國睇戲的味道。

僻靜的小睡卧間

自成一國的睇電視座位

有觀景位可以瀏覽整個候機大堂風景

至於整個飲食區，有一條超長的自助餐桌，有特色的小食如雞蛋仔，蝦餃、燒賣等點心，簡浩賢還介如果想吃即食麵可以來一碗叻沙，微辣的椰奶湯汁精神爽利，相當有專業水平。

超長的自助餐點飲食區，有一個微型自助餐

搭港航商務客位價錢平一半有多，亦可以享受舒適的貴賓廳服務，真係覺得幾正，即使坐經濟位花350元就可享用貴賓室，一餐飯的價錢，只係食嘢都收回成本。這間後起之秀航空公司的競爭力，真不容小覷。

Sebastian

** 博客文章文責自負,不代表本公司立場 **

旅發局進一步擴大旅遊義工計劃，準備招募更多對旅遊業有熱情的市民尤其是年輕人，希望佢哋身體力行做好東道主的角色，同旅客分享各種旅遊主題和知識。

Sebastian去聽了這些義工分享的經驗，發覺原來喺旅發局做義工真係唔係「義工」兩個字咁簡單，佢哋的經歷有趣的一面，也有感人之處。

「旅遊義工」Agnes退休前任職跨國公司管理層。

退休前在一家跨國公司做管理層的Agnes，擔任旅遊義工計劃已經有12年的時間，有什麼令佢印象深刻的經歷呢？Agnes分享話，在2018年的時候，遇到一位英國來的老人家，帶住一家大細同一本相簿，想搵返相片中的景色拍照留念。原來呢一位英國老人家係喺香港出生，5歲時跟隨父母返回英國居住。根據呢位老人家的自白，他對香港的記憶全部來自父母影低嘅相。

收到呢個請求之後，Agnes就一心想幫佢完成這個心願，認真幫老人家研究攝影地點喺邊度。結果就發現，除了一個景點外，其餘全部都對得上，Agnes就教老人家如何去現場影返啲相。佢哋影相時甚至擺出了當年老人家父母的甫士。

因為參加義工計劃不是日日返工，每次服務時長僅需大約3個鐘，Agnes隔幾日才會去到尖沙咀旅遊咨詢中心當值。事件過去後，有天返時時，有旅發局同事搵到Agnes，話英國老人家來告別，留底紀念品俾佢。Agnes打開禮物一睇非常感動，原來係老人家的父母當年喺香港影的舊照片。Agnes覺得呢啲係老人家的獨家回憶，不敢收藏，因為承載咗佢對父母的緬懷。後來先知，原來老人家已將舊相數碼化，送俾Agnes嘅係拷貝，現在存放在旅發局。

Agnes話，每當想起這段回憶，自己能夠幫老人家完成心願，好有滿足感。

退休之前喺跨國企業做管理層的Agnes仲笑言話，做義工工作仲有一個好處，就係佢平時返工工作壓力非常之大，做義工反而係佢緊張的工作生涯找到放鬆自己的一種好方法。

由新加坡回流香港發展的Marco，透過參與「旅遊義工」計劃重新認識香港。

Marco做咗6年的義工，佢係土生土長的香港人，但之前去了新加坡定居工作，但仍然覺為香港「做番啲嘢」，於是加入到義工招募計劃，現在從新加坡回流回香港，更希望通過計劃喺香港服務遊客，將香港的旅遊咨詢同旅客分享。

由於曾在新加坡生活，熟番當地人的生活習慣和語這，在做旅遊義工時，可以運用經驗協助遊客，例如，了解新加坡沒有鵝，只有鴨供應，所以明白新加坡遊客到香港品嘗和購買燒鵝是熱門活動，他就一早了解定向遊客介紹。

做旅遊義工，除了要求兩文三語流利，如果識多一種語言，對工作就更有幫助。Marco就笑言，除了三語，他仲識講新加坡式的英文，咁接待新加坡遊客時，佢就有個人優勢，黎到香港玩的新加坡人亦會覺得有親切感。

最新一期的旅遊義工計劃已開始招募，一直去到5月31日截至。今年成功入圍咗呢個計劃的學員，除咗可以學習多項本地旅遊方面的知識，譬如傳統本地文化、購物、綠色旅遊等等，今年仲邀請到星級導師，教大家點樣做好旅遊使者。

各位如果有興趣都可以試下報名參加計劃，為香港旅遊出一分力，亦都係結識世界唔同地區朋友嘅好好機會。