中國語文重設範文在教育界炒到熱熱鬧鬧，教育局長吳克儉當然要講吓睇法，今日佢出席一個電台節目後見記者，一番詳盡解釋後，有記者就要考吓局長：

 

記者：有何句子你現在記得，正如你所說在必要時可運用出來？

 

教育局局長：突然間我未必能回答，待我回答所有問題後再嘗試。

 

再答完記者一輪追問，吳局長真係守諾言，同大家分享吓，先談到「浪淘盡，千古風流人物」，話呢啲字句，你單去「嗒」、去記很容易，但你如何看「浪淘盡」三個字，將整個景色擺出來，「千古風流人物」中將人的因素放在其中，景和人的配合，幾個字擺出很多境況出來，這是一個例子。

 

跟住吳局長就講到另一篇入選範文「出師表」，話係佢比較喜歡的文章，仲諗幾句出嚟，根據新聞處發出的稿件，吳局長原話：

 

「不宜妄自菲薄，引喻失義」，八個字道出很多人生意義，在管理哲學上亦有提及一點，我是頗喜歡的。

 

本來吳局長與大家分享人生哲理係幾正面訊息，或者要怪就怪新聞官太老實，將原文發出後，有眼利行家，即刻發現「不宜妄自菲薄，引喻失義」加埋唔係十個字咩，點解下段話「八個字道出很多人生意義」，繼新聞專員上任前的「三個字」小風波後，又再引嚟「八個字」小小風波，唔通政府內部有傳染病，都真係有啲不幸喎。

 

講句公道話，局長沉思於人生哲理中，十個字定八個字呢啲「小問題」可能顧及唔到，作為新聞官原話照錄又無錯，換在私人機構的公關，唔知段文字稿唔知會唔會改為：

 

「不宜妄自菲薄，引喻失義」，道出很多人生意義，……。

 

新聞稿原圖：




巴士的 Gossip

** 博客文章文責自負,不代表本公司立場 **