樂視在香港大展拳腳，投到未來三年英超的轉播權，嚇咗市場一跳。Sebastian昨日跟老細去樂視觀塘鴻圖道總部參觀，見到佢哋產品之多，真係大開眼界。參觀之前已經睇到佢哋早一日發布消息，宣布搞電動車，與美國電動汽車公司Faraday Future（法拉第未來，簡稱FF）展開戰略合作，FF最新公布一款名為FFZERO1的電動超級概念跑車，流線型車身，仲有成1,000匹馬力，最高時速逾200英里，被外界形容是「Tesla殺手」。
65吋4K電視
去樂視總部當然無汽車睇，但都睇咗好多新產品。例如佢哋65吋4K電視，雖然佢哋最大的128吋電視無在香港展示，但係65吋都相當大。以佢11000元的價錢，包咗16個月的月費(樂視月費99元一個月)，扣埋月費，部機1萬都唔使，睇落相當吸引。目前4K電視節目都唔係太多，但未來到4K浪潮殺到的時候，樂視的電視機都有殺傷力。
3D頭盔，可戴上眼睇戲
佢哋仲展示好多未來在香港推出的產品，除了兩款手機外，仲有好多有趣的產品，例如3D的頭盔，價錢2699，最特別係一部專業的智能爬山單車，叫咗「狂鳥」。未定在香港的開售價錢，在國內定價7000元人仔，仲有更高檔的版本，成部爬山單車非常智能化，除咗炭纖維車架之外，仲有GPS wifi記錄車主的行車紀錄。
智能爬山單車
睇咗樂視咁多產品，最後就同樂視亞太區總裁莫翠天傾咗一陣，樂視在深圳上市，曾經大炒打炒，炒到幾千億市值，依家股價雖然回落咗，但係外界都好關心佢哋會唔會在香港上市。莫翠天就話有興趣在香港上市，佢亦都講到阻礙阿里巴巴不能在香港上市，香港無AB股制的問題，互聯網公司當然都希望分開AB股，讓管理層可以少數人持股，莫翠天話佢哋暫時無呢個問題(即主要股東仍然控制大股)，但佢亦都希望香港有AB股制，科技公司上市不外乎係香港、新加坡、美國的NASDAQ，要睇吓邊個市場提供更好的上市條件。
莫翠天直言有上市集資的需要，因為有資金的需求，佢話：「互聯網公司最需要的就係錢，有錢就可以做多啲投資，例如佢哋希望製作5萬小時的節目。」雖然咁大量的節目，觀眾睇好耐都睇唔晒，但由於觀眾口味不同，製作節目愈多就愈能迎合更多觀眾的需要。
聽完樂視的展示，發覺佢哋係野心好大的企業，佢哋競爭對手，無論係有線電視公司或者係手提電話公司都要小心啦。
Sebastian
** 博客文章文責自負,不代表本公司立場 **
旅發局進一步擴大旅遊義工計劃，準備招募更多對旅遊業有熱情的市民尤其是年輕人，希望佢哋身體力行做好東道主的角色，同旅客分享各種旅遊主題和知識。
Sebastian去聽了這些義工分享的經驗，發覺原來喺旅發局做義工真係唔係「義工」兩個字咁簡單，佢哋的經歷有趣的一面，也有感人之處。
「旅遊義工」Agnes退休前任職跨國公司管理層。
退休前在一家跨國公司做管理層的Agnes，擔任旅遊義工計劃已經有12年的時間，有什麼令佢印象深刻的經歷呢？Agnes分享話，在2018年的時候，遇到一位英國來的老人家，帶住一家大細同一本相簿，想搵返相片中的景色拍照留念。原來呢一位英國老人家係喺香港出生，5歲時跟隨父母返回英國居住。根據呢位老人家的自白，他對香港的記憶全部來自父母影低嘅相。
收到呢個請求之後，Agnes就一心想幫佢完成這個心願，認真幫老人家研究攝影地點喺邊度。結果就發現，除了一個景點外，其餘全部都對得上，Agnes就教老人家如何去現場影返啲相。佢哋影相時甚至擺出了當年老人家父母的甫士。
因為參加義工計劃不是日日返工，每次服務時長僅需大約3個鐘，Agnes隔幾日才會去到尖沙咀旅遊咨詢中心當值。事件過去後，有天返時時，有旅發局同事搵到Agnes，話英國老人家來告別，留底紀念品俾佢。Agnes打開禮物一睇非常感動，原來係老人家的父母當年喺香港影的舊照片。Agnes覺得呢啲係老人家的獨家回憶，不敢收藏，因為承載咗佢對父母的緬懷。後來先知，原來老人家已將舊相數碼化，送俾Agnes嘅係拷貝，現在存放在旅發局。
Agnes話，每當想起這段回憶，自己能夠幫老人家完成心願，好有滿足感。
退休之前喺跨國企業做管理層的Agnes仲笑言話，做義工工作仲有一個好處，就係佢平時返工工作壓力非常之大，做義工反而係佢緊張的工作生涯找到放鬆自己的一種好方法。
由新加坡回流香港發展的Marco，透過參與「旅遊義工」計劃重新認識香港。
Marco做咗6年的義工，佢係土生土長的香港人，但之前去了新加坡定居工作，但仍然覺為香港「做番啲嘢」，於是加入到義工招募計劃，現在從新加坡回流回香港，更希望通過計劃喺香港服務遊客，將香港的旅遊咨詢同旅客分享。
由於曾在新加坡生活，熟番當地人的生活習慣和語這，在做旅遊義工時，可以運用經驗協助遊客，例如，了解新加坡沒有鵝，只有鴨供應，所以明白新加坡遊客到香港品嘗和購買燒鵝是熱門活動，他就一早了解定向遊客介紹。
做旅遊義工，除了要求兩文三語流利，如果識多一種語言，對工作就更有幫助。Marco就笑言，除了三語，他仲識講新加坡式的英文，咁接待新加坡遊客時，佢就有個人優勢，黎到香港玩的新加坡人亦會覺得有親切感。
最新一期的旅遊義工計劃已開始招募，一直去到5月31日截至。今年成功入圍咗呢個計劃的學員，除咗可以學習多項本地旅遊方面的知識，譬如傳統本地文化、購物、綠色旅遊等等，今年仲邀請到星級導師，教大家點樣做好旅遊使者。
各位如果有興趣都可以試下報名參加計劃，為香港旅遊出一分力，亦都係結識世界唔同地區朋友嘅好好機會。
