九倉話經過策略評估後,將撤出通訊、媒體及娛樂的業務,話對有線寬頻的資金承擔於期滿後將不會延續。Ariel聽完跌落地,咁做有線電視的朋友點算?
九倉早前以95億向TPG資本組成的財團出售九倉電訊,但不包括旗下經營媒體業務的有線寬頻(1097)。之前一直表示為有線寛頻找買家,而家宣布搵唔到買家,要停止泵水。
過去唔係無人洽賺有線寛頻,說到底個上市殼都值6、7億,即使做電視生意長期蝕錢,間公司又唔至於全無價值。但聞說多數出價者都只係俾好低價,九倉不感興趣。
但據政壇高人講,唯一願意出得起價的人可能是肖建華,他透過一個「白手套」人物接洽有線,聲稱願意收購,當時市傳的出價是20億,雙方有初步接觸。
不過後來有人提醒九倉,若然收購的幕後人是肖建華,他的錢就未必好乾淨,這種交易無論收幾多錢都做唔過,因為萬一被認定為黑錢,手尾好長。九倉是大集團,帳目乾乾淨淨,馬上就縮沙。
疑似肖建華一方的洽談告吹後,就沒有願意出較高價錢的收購者。所以可以話,肖建華買唔成,係有線電視的死亡關鍵。
不過後來肖建華被勸回國助查,九倉都執一身彩,否則若然和他的「白手套」達成協議,最後交易亦未必能完成,還可能有手尾跟。
Ariel
** 博客文章文責自負,不代表本公司立場 **