建制派WhatsApp事件如深水炸彈, 成為政壇必須八卦的題目, 昨晚中聯辦主任張曉明請建制派的立法會議員飲夜茶, 據聞曉明哥臨時加插講話內容,提到遇到挫折不要氣餒, 仲講到對朋友不要出賣,係作為政治人物應有的政治道德底線, 有傳媒形容曉明哥真係動咗氣喎。
政壇高人就話,政治的事有時就係有啲玄,早前因為投票「甩轆」 事件,建制派進入互指不是的境況, 大家都唔知昨晚的茶聚會唔會面阻阻,不過, 因為即時通訊內容被爆後,出席者都不耻隻內鬼所為, 反而有啲同仇敵愾的feel。
聽聞呢兩日建制派中人講起內鬼單料,都第一時間舉手劃清界線, 甚至發毒誓否認係爆料者,最有趣係阿Paul謝偉俊今早上電台啦 ,又被追問係咪係內鬼,佢就話唔適宜再捉鬼, 因為咁做對件事無好處,他強調「 我從冇刻意做任何嘢破壞曾鈺成主席威信、破壞建制派的團結, 呢個我可以好清楚咁講。」到主持人追問: 你可唔可以好清晰咁講一次謝偉俊唔係放料人?佢就答:「唔係, 到此為止,我唔想再評論任何嘢啦!」阿Paul的答案最可圈可點係「冇刻意」做嘢破壞曾主席威信呢個point,聽番答問過程, 佢都有機會爭奪「最口窒議員獎」啦!
高人就分析42名建制派議員,好容易排除到誰是內鬼,工聯會、 民建聯一直以來隊型較緊,不太可能做呢啲事; 經民聯喺今次甩轆事件搞到焦頭爛額,唔似會再搞事;葉劉同自由黨,一個係公務員出身,一個黨員都從政二三十年,對政治有基本的訓練,對佢哋來講有不同意見都會直講, 但搞咁呢啲小動作放料隊自己人就唔似。高人話有啲「散兵」 之前都表達過建制派召集人來來去去都一兩個人做, 係咪可以好似泛民咁飯盒召集人輪流做, 可能有人因為不滿而搞出事。
不過,高人覺得無論邊個係內鬼都好,日後佢都好難在政界立足,就算想威威投身做泛民,相信有前做內鬼前科,都好難得到人家信任,正所做得奸細好難有容身之處啦! 從政者都要認真諗吓啦。
Ariel
** 博客文章文責自負,不代表本公司立場 **