臨放暑假,政治任命官員突然有變,國務院今日根據行政長官梁振英的建議和提名,委任劉江華出任民政事務局局長和張雲正為公務員事務局局長,同時免去曾德成和鄧國威的局長職務。
這次局長執位之前無乜風聲吹過出來,政界口痕友們當然到處打聽,兩位局長點解離任,接近政府高層消息人士就提醒,今次變動可以話係「換人」形容貼切啲。
消息人士直指公務員事務局局長鄧國威唔太稱職, 話佢出任局長後俾人有hea做的感覺,唔夠投入, 有公務員工會更向特首CY反映,鄧國威做公務員事務員局長影響咗公務員和政府的夥伴關係,所以他被請離開,令人不感意外。消息人士又話,同樣AO(政務官 )出身的張雲正,調任海關關長後,處理與海關工會的關係做得幾好,故特首相信佢可以勝任公務員事務局局長的工作。
至於民政事務局局長曾德成,已經做過三屆政治任命官員,這屆政府上台時,佢都提過在適當時候退落嚟,曾德成依家66歲,年紀都算大,換上58歲的劉江華,相信會更有「火」投入工作。
接近政府高層消息人士話,CY任期中途換高官,要得到阿爺首肯,若阿爺唔支持,好難中途換人。睇嚟中央都支持佢盡快調整團隊,在後政改時期,加強戰鬥力。
政壇八卦友就分析,CY在訪京後話「要再服務香港市民」。 今次任期中高調「換人」做法,CY似乎開始為連任特首舖路,要傳出訊息,佢要強化團隊打硬仗。
Ariel
** 博客文章文責自負,不代表本公司立場 **