好彩最後都平安無事。
母親節將至，身為三女之母的陳嘉寶（Anjaylia）早前一家到北角玩滾軸溜冰預早慶祝。這個母親節，Anjay將忙於帶着三個囡囡Hosanna、Eliana與細女Azaliah跟嫲嫲、婆婆三代同堂溫馨度過。
Anjay與丈夫黃頌祈（Epaphras）三年抱三，被Anjay視為「神隊友」的Epaphras十分照顧家庭，Anjay說：「其實我好幸福，有乜嘢事老公真係落手落腳去做，畀足時間我休息，要照顧一大三細嗰個係我老公，哈哈！」
Anjay感激老公落手落腳幫手湊囡囡。
懷胎十月，母親所經歷有甜，也有苦，原來Anjay在懷第三胎女兒Azaliah、臨盆在即的時候，曾遇到胎位不正，要住院近兩星期，當時她憂心胎中的Azaliah，同時惦念着家中的兩位小寶貝，令她一度感到沮喪。
Anjay陀第三胎時，拍過寫真照片留紀念。
Anjay說：「其實陀頭兩個女嘅時候都好順利，都冇嘔、冇抽筋呢啲狀況，到第三胎，起初都冇嘢，但係到第八個月時發現有胎位不正嘅情況，本身七、八個月嘅時候BB個頭已經向下、係一個適合生產嘅位置，但係到八、九個月嘅時候，BB喺肚入面180度咁轉，個頭轉返上去不特止，成個BB打橫喺個肚度，醫生話有危險，因為一穿水，BB有可能踢到臍帶就會好危險，如果係咁就需要緊急開刀，所以醫生就建議即刻入院觀察，入到醫院醫生有兩個建議，一係人手轉胎位、一係就等到38周後開刀……」
Anjay帶囡囡玩滾軸溜冰。
Anjay續說：「正常來講肚入面唔會有咁多位可以轉，加上BB已經6磅幾差不多7磅，但係好神奇，佢可以每日都喺度轉，去到39周，本來都諗過要開刀，不過我最希望都係可以順產，當喺醫院同屋企兩個BB視像時佢哋喺度喊，我哋都好掛住大家，真係好肉赤。去到39周，BB終於冇乜再轉嘅時候，醫生就話時機成熟，幫我做人手轉頭，之後BB都好乖冇再轉嚟轉去，我就返咗屋企待產。」
一家去玩滾軸溜冰，認真溫馨。
Anjay其間都有擔心BB會在她平趟時轉身，所以就用枕頭墊住好似坐喺度咁瞓，最後過咗41周就順產，成個過程都好擔心，但經歷過呢樣嘢後，母親節她最大願望就只係小朋友健康開心。
