劉心悠首踩Roller驚到喊 馬浚偉主動英雄救美改劇情

馬浚偉和劉心悠等今日（18日）出席港台電視電影《我們的開學禮》煞科記者會，馬仔和心悠示範踩滾軸溜冰（Roller），但心悠對Roller卻是零認識，穿完Roller鞋後連站起來都有難度，要工作人員扶她起身，馬仔隨後上前拖住，見心悠用力捉實對方慢慢行，過程雖只有短短數分鐘，但心悠最後都是驚到喊，拍照時一臉委屈。

心悠未換鞋前一臉輕鬆。

心悠企起身已捉實馬仔。

心悠個樣就嚟跌。

心悠事後表示很害怕，因她完全不識踩Roller，很怕會失去重心，馬仔則指二人早前拍Roller戲時，心悠連一呎都走不到，今日已經很叻很厲害，笑言下月大家再拍攝時，可以改成心悠擅長的網球戲、木工戲和鸚鵡戲。問到心悠當日拍攝時要幾多時間做心理準備？她笑說：「無時間，一來到就要拍，之後就好似畀人推輪椅咁推出去。」馬仔笑指心悠當時尖叫得很大聲，完全是真實反應，更透露因此而改劇情：「本來我們是一起在天台踩Roller行一圈，但心悠行兩步都唔得，所以改成我踩完一圈後再去找她。」問到心悠可會克服踩Roller？她笑指太遙遠，日後可避則避。

心悠真係好驚，表情控制失敗。

心悠最後忍唔住喊。

心悠自言踩滾軸溜冰，好似畀人推輪椅咁推出去。

另外，心悠主演的新劇《冥冥之中》將於月尾在ViuTV播出，有指TVB變陣迎戰，將正在播映的《雙生陌生人》刪減5集，並以譚俊彥和陳山聰合演的《十八年後的終極告白2.0》迎戰，心悠被問到可覺得被TVB睇重？她說：「其實是益了觀眾，大家都多了選擇，能夠刺激市場就最好。」馬仔認為最開心是百花齊放，觀眾多了選擇，業界也繼續有工開，指《我們的開學禮》暫定6月播出，到時觀眾可以晚晚見到心悠。

心悠的表情好委屈。

馬仔自爆因為心悠拍攝時尖叫得很大聲，因而要改劇情。

《新城體育會》再出動打羽毛球！

《新城體育會》昨日（4月24日）舉辦了第三次羽毛球活動，新城廣播有限公司首席營運總監馬浚偉帶領「新城羽毛球隊」，邀請歌手郭偉亮（Eric Kwok）、黎展峯（Andy）及龔柯允（Karen）齊齊打羽毛球揮灑汗水，而新城知訊台台長程凱欣亦首次落場，獲得馬浚偉大讚台長：「打得好好喎！」台長更貼心地一直陪著自嘲來執波的龔柯允打波，馬浚偉更鼓勵Karen：「肯出嚟做運動，出身汗，已經好好啦！」

《新城體育會》昨日（4月24日）再出動打羽毛球。

郭偉亮打波反應快 但自言冇乜耐性
眾所周知Eric Kwok熱愛滑雪，但他其實同樣熱愛羽毛球，Eric Kwok表示：「我個幾禮拜就會打一次羽毛球，都打咗十幾年，啱啱返香港時成日同趙增熹一齊打，嗰時操得好勁，一星期打兩三次，又有教練教，但自從做咗XiX經理人之後就冇再打。」他解釋因之前打羽毛球拉傷膊頭，故休息了兩個月沒再打。

今次是Eric Kwok相隔十年再跟馬浚偉打羽毛球，他憶述：「我記得大概係十年前，有個唔知咩比賽同馬生打過一次，印象中佢打得好好，佢又高，有晒打羽毛球的身形。」問Eric Kwok有甚麼絕招？他笑言：「絕招就係好快打完，我冇乜耐力，但反應快，始終都係要練習。」

Eric Kwok同陳奕迅（Eason）老友鬼鬼，二人亦經常相約打波，他表示：「佢本身係打網球，我有一排都同佢打羽毛球，佢都打得好好。（邊個勁啲？）網球佢勁我好多，因為佢主力打網球，羽毛球我打得耐過佢，有時會教佢，但最主要我哋玩雙打好開心，我哋好夾、好有默契，又唔會爭波打，唔會在乎輸贏，同佢打波好開心，佢成日笑。」

黎展峯小時候獲任職羽毛球教練外公教授羽毛球技。

嬌小龔柯允原來是籃球健將，馬浚偉承諾稍後安排打籃球。

黎展峯靠做運動減壓 最近學耕田
黎展峯（Andy）球技似模似樣，他透露小時候獲任職羽毛球教練的外公教他打羽毛球，所以自小已打羽毛球，他笑言：「我身高183cm，係高度取勝，唔打得都睇得，但技術要再鍛鍊，平時都會約同公司的歌手黃明德打籃球，當自己有壓力或者想抒發吓就會做運動。」而近日他更一嘗耕田滋味：「我朋友有個地方自己種菜，唔係玩盆栽仔嗰啲，真係有塊田要除草、翻土，成件事身心都好健康，本來以為好易，但原來要用晒成身，仲辛苦過跑步。」

龔柯允自嘲來執波 興奮獲馬浚偉承諾安排打籃球
至於龔柯允（Karen）則自嘲是來「執波」，她稱：「我係鄉下式打法，完全冇技巧可言，所以過嚟執波，或者搵Eric sir教我。」不過身形嬌小的龔柯允，原來是籃球校隊，她笑稱：「如果唔打會更加矮，同埋因為高度問題，冇辦法落場，雖然爸爸係籃球會主席，但佢唔會因為咁偏心我，反而自己會游水、跑步、踩單車，練吓肺活量，對唱歌好有幫助。」馬浚偉並向她許下諾言，稍後安排打籃球，Karen聽到後，十分興奮表示一定報名出席！

郭偉亮自爆打波絕招……就是……好快打完！

馬浚偉與郭偉亮、黎展峯、教練Arthur玩雙打。