屋企樓下又開一間譚仔了。真心唔知原來香港人咁鍾意食辣，除咗雲南米線舖，川菜館更開到成行成市，就連茶餐廳都要跟風推出酸菜乜乜餐。港人太習慣吃苦中苦，或者吃得辣中辣，先算係人上人啩。

霸戲哥細個都鍾意食辣，以前仲會喺雪櫃偷辣椒蘿蔔當零食，以前講緊幾蚊罐，依家居然賣到廿幾蚊，食水深到呢。人到中年腸胃唔好，每次食完麻辣火鍋都會「屙辣屎」，所以慢慢遠離辛辣。但有時辣癮起都會忍唔住口，肚屙咪肚屙囉。

今晚J2節目《開火》主題就係「辣到飛天」，廚藝大師楊尚友示範一道「邪惡水煮肉眼」，將1kg肉眼成嚿掟落煲度煮，再放滿丁香、花椒、指天椒、孜然等香料，再倒油落煲煮熱，最後切成細塊上碟，大爺雞睇見都流口水。

辣其實係有指標，1912年美國化學家Wilbur Scoville以辣椒素（Capsaicin）嘅含量制訂咗一個指標，並以自己姓氏命名為「Scoville Scale」，量度單位為Scoville，或SHU（Scoville Heat Unit）。我哋平日食嘅辣椒大概1萬SHU，而全球十大最辣辣椒，如「龍之氣息」（Dragon's Breath）就有248萬SHU，傳聞咬一啖可即時gg。

咁唔係辣到飛天，係辣到升天先啱。




霸戲哥

** 博客文章文責自負,不代表本公司立場 **