蓮香樓結業，又一間百年老店抵受唔住疫情嘅經濟重創而宣佈投降。
霸戲哥身為港島人，點會冇去過蓮香，但印象中都唔超過5次，主要係價錢太貴啦，畀班慕名而來嘅旅客炒到貴晒。
蓮香樓啲嘢食係OK嘅，記得每次都食肥叉飯，舊叉燒唔會太燶身，最重要係成條上，夾住嚟咬勁霸氣。當然佢哋招牌嘅豬膶燒賣、蓮蓉包都會嗌，但其實我麻麻哋。去得蓮香樓，都係貪佢陣舊式茶樓氣氛，一盅兩件，水滾茶靚。每次有點心出爐，茶客蜂擁而上，雖然肚餓但都客客氣氣。以前去得幫襯嘅都有陣儒雅味，唔少係大編輯、老總，嚟嘆茶唞唞氣。
因為蓮香樓嘅歷史，自然成為電影嘅取景地，印象最深刻一定係陳果嘅《去年煙花特別多》。何華超戲中飾演被遣散嘅華籍英兵，感覺被時代遺棄。臨尾去到蓮香樓同班靚仔講數，情感大爆發，立刀亂劈班蠱惑仔，成為經典場口之一。
《去年煙花特別多》係陳果「回歸三部曲」嘅第二部，原來都已經24年前嘅事。過去會過去的，蓮香樓都不能例外。
霸戲哥
** 博客文章文責自負,不代表本公司立場 **