「我個仔死得好慘，我個仔先得22歲，大好前途，我希望社會各界幫我查明真相....呢個係一個人為疏忽....呢啲係謀殺，唔係普通工業意外！」秀茂坪安達臣道塌天秤奪命工傷中，最年輕死者為22歲的潘浩鈺，潘母9日早上往殮房認屍後哭訴痛失兒子，哭成淚人，盼各界查明真相，還她愛兒一個公道。
地盤塌天秤壓傷工人。資料圖片
潘母在工權會及建造業工會人員陪同下前往殮房認屍，她認屍後情緒激動，要工會人員攙扶下離開。她向在場傳媒哭訴：「我個仔死得好慘！我個仔先得22歲，大好前途，仲喺度進修，我希望社會各界幫我查明真相，因為我個仔先得22歲，先做咗幾個月嘢，啱啱先讀完書出嚟，邊個畀一個公理我，邊個畀一個真相我！」
潘母（中）盼各界人士為她查明真相，還愛兒的死一個公道。
「我希望社會各界，政府各部門，呢個係一個人為疏忽，係人都睇到，你冇工作嘅時候，冇大風大雨嘅時候，成個天秤咁樣，成個腳斷咗，咁樣蹺起，唔係人為疏忽？呢啲係謀殺，唔係普通工業意外。呢啲係人為疏忽，要拉啲人去坐監，邊個還返個仔畀我?」
另一許姓死者的家屬到場認屍，女親友傷心拭淚而去。
「我依家係破碎家庭，我住咗劏房11年，我左捱右捱，捱大個仔，我上咗樓先三幾年咋，我含辛茹苦，我個仔好乖，好聽話。香港人、香港政府，你哋幫吓我，我乜嘢都唔識，我要同我個仔攞返個公道呀！我要攞返我應得嘅賠償，你叫我以後嘅生活點樣過呀？希望各界人士查明真相，還我哋一個公道！討回一個公道！希望你哋幫手！我個仔依家連安葬費都未有，都冇人同我提過呢一樣嘢，我仲要周圍頻頻撲撲。」
「我食唔落，瞓唔着，你叫我點捱，你哋畀返個仔我！我得一個仔，我冇咗生存落去嘅希望同精神支柱，你哋要幫我，我得一個仔呀........嗚嗚........」潘母頓時哭成淚人，她又指今天並無地盤有關職員或政府部門人員接觸她。
而另一名死者，41歲電工許文明的兩名親屬亦到殮房認屍，認屍後其中女親友亦不時拭淚，神情哀傷，其後乘的士離去。
22歲助理工程師潘浩鈺母親(中)認屍後哭成淚人，直言兒子死得好慘。
事發於7日上午10時許，秀茂坪安達臣道地盤一個重65噸的天秤倒塌，擊中地盤多個貨櫃辦公室，導致3死6人受傷。41歲電工許文明頭顱骨折及大量出血，當場證實死亡；22歲工程師助理潘浩鈺身體多處骨折，送往聯合醫院後搶救後終告不治；25歲外判工程師徐學培被困天秤底部，在事發後約7小時後被救出，當場被證實不治。其餘6名傷者分別送往伊利莎伯醫院和聯合醫院治理。
