Disney+好似靜咗一輪，近日終於有大作上架，就係Tom Hanks主演嘅《木偶奇遇記》真人版電影。

呢套家喻戶曉嘅童話，動畫版實在太深入民心，迪士尼梗係唔會就咁照辦煮碗再拍一次，所以都作出咗唔少改動。至於改得好唔好，就真係好見仁見智。

我哋認知嘅Pinocchio，當然係講大話鼻子會伸長嘅版本，細蚊仔睇完真係有童年陰影，唔敢乜都隨口噏。不過呢個已經係迪士尼嘅「淨化」版本，抹去原作者Carlo Lorenzini（筆名Carlo Collodi）嘅原本意義。

原版《木偶奇遇記》其實係關於個人解放，作品黑暗且富有政治批判色彩。作者借Pinocchio呢個角色，去警惕當代嘅意大利人，唔接受教育就會好似木偶咁容易被人操控，又或者淪為政治嘅傀儡，做「人」不成，鬼唔似鬼。簡單講，就係「細個唔讀書，大個做運輸」。

呢個上上世紀嘅童話故事，佢嘅寓意到今日依然適用。只不過，Carlo Lorenzini應該都估唔到，今日有人就算飽讀詩書，都心甘命抵選擇做扯線公仔啫。




霸戲哥

** 博客文章文責自負,不代表本公司立場 **