今日啲風特別旺，今朝先寫完《暴風之年》，晏晝就傳來影壇好消息，由翁子光執導，霸戲哥偶像郭富城、豬視妹偶像梁朝偉，兩大影帝聯手主演嘅電影《風再起時》，將代表香港角逐第95屆奧斯卡金像獎最佳國際影片，亦係史上第五套香港作品角逐該獎，前四套分別係張藝謀嘅《大紅燈籠高高掛》，陳凱歌嘅《霸王別姬》，王家衞嘅《一代宗師》，同埋曾國祥嘅《少年的你》。
《風再起時》以「四大探長」事跡為題材，郭富城飾演「磊樂」（呂樂）探長、梁朝偉飾演「南江」（藍剛）探長、譚耀文飾演「嚴洪」（顏雄），周文健飾演「肥B」（韓森）。鍾意港產片嘅讀者，對四大探長嘅故事絕對唔會陌生，但以翁子光嘅視嘢，相信會拍出一個唔同嘅角度同視野。
早前《風再起時》喺香港國際電影節首映，門票極速售罄，有幸觀摩呢套戲嘅人唔多，霸戲哥同豬視妹梗係心急想睇啦，不過暫時呢刻都未有確實映期。但可以肯定嘅係，港產片呢浸強勢仍然會持續一輪。
霸戲哥
** 博客文章文責自負,不代表本公司立場 **