前新聞主播方健儀(Akina)在Boxing Day拆禮物日分享最新一段影片,原來今年的聖誕禮物是「收樓」!
方健儀跟丈夫洪楚恆2020年斥資1850萬購入「柏傲莊I」的三房單位,單位實用面積754方呎。聖誕節佳節翌日的Boxing Day終於成功收樓,兩公婆特別拍攝新屋開箱片,俾大家睇睇新居的環境和設備。
從影片可見,該單位可望及沙田城門河、遠眺馬鞍山,景觀相當開揚,而室內就有好多貼心細節位,方健儀就一路介紹一路大讚!
方健儀還在影片介紹中大方分享買樓心路歷程,表示:「關於呢份聖誕禮物,我想講一個關於緣份的故事⋯⋯5年前,開車路過大圍,紅燈停喺呢個地盤前。抬頭一望,有種特別感覺,可能因為兒時喺沙田新田圍邨住過,喺沙田官立中學讀過書,喺青龍水上樂園玩過,好合眼緣。」
她續指:「2年前,從來沒有抽獎運嘅我,人生第一次入紙抽新樓。第一輪,洪先生與我都好緊張,但獲告知排位為3000至4000,即係無望。但我哋冇失望,因為人生試過多次陪跑,這些機會不屬於我.jpg。第二輪,經紀催我哋再入紙,我哋心諗算吧啦,不過抽唔到又冇損失,繼續去試,一切隨緣。」
「某個晚上,好記得我倆喺西貢食緊壽司,已經忘記當日抽籤。晚上8點,經紀打電話來,氣匆匆話:『方小姐,我幫你對咗10次,你中咗呀,中咗呀!』我一頭霧水問:『中咩呀?中Covid?我冇呀!』經紀話:『你中咗籤呀!43號呀!」我仲好低能咁問:『43號係咩概念呀?』經紀反晒白眼話:『即係你買到樓呀!明日揀樓啦!』吓?明日揀樓?唔係化?我乜都未準備啊:我揀咩座向?揀幾咩面積?夠唔夠錢買?忙亂間,我諗起當年自己43歲,抽到43號籌,算是有緣。」
方健儀感慨:「今天,終於收樓了。我不信風水命理,但相信人與人、人與事、事與事,都有一種緣份。這份聖誕禮物,由最初嘅眼緣、中間嘅隨緣、到最終有緣,就同洪先生與我相知相遇一樣,都是順著『緣』字走。亦因為呢個『緣』字,促使我為兩口子嘅將來,及早做一啲實質部署。呢度將會係我哋嘅新安樂窩,舊安樂窩亦會留住,希望大家同窗外景緻一樣,新一年一切順風順水。」