王維基是一個叻人，叻人都係寸寸哋，講真去採訪遇著咁樣的人，總要打醒十二分精神，又要抵得住俾佢寸喎，係既想去做，但又容易瀨嘢的 Assignment，有時俾佢帶住遊花園，寫出嚟的稿，實俾採訪主任炳到暈。
見過佢一、兩次，雖然身型瘦削，但面上總是充滿自信，係果種典型醒目港人的風格，喺佢面前好似沒有克服唔到的難題。但原來呢種「香港仔」的朝氣，遇上高高在上的官僚，也會顯得束手無策的無奈。
仲記得去年聖誕前，所有期望有更多電視節目選擇港人都開心不已，電視直播中睇到王維基攞住手機、平板電腦、接駁器，每個解說都掩不住的笑意，真的好期望，可以快啲到七月一日，恨不得明天就可以煲晒警界線(真係好鐘意睇智叔的戲)。
可惜現實總係殘酷，不到三個月，佢再開記者會，竟然係咁壞的消息，那天見佢沉重地講出要無限期押後啟播，臉容明顯憔悴了，憤怒的表情中藏著更多啲係無奈，到上電台節目時，更一度哽咽，唉，點解不能讓佢有一條生路行呢，點樣先可以欣賞到港視員工的心血呢？！
有評論質疑佢想搵路退，又認為政府唔係冇道理，請問，一個已經咁成功的人士，人到中年先將全副身家和精力，投入搞電視，重拾香港影藝創意工業的希望，點解唔俾佢搞？幾多人唔想睇cheap到痺的掌門人，更加唔想睇連節目名都嗡唔出的亞視，抱著期望等待港視面世，王維基一直都強調自己係一個商人，想在有一個合理回報前景下，為電視行業帶來一片新景象，有什麼錯呢，總係條條路都行唔通呢？
一個識變通的商人，比起其他只講銅臭的鉅富，王維基睇起嚟多咗一份熱忱和理念，睇吓團結喺佢身邊的港視員工，我真係未見過一班人被老闆裁員，仲個個出嚟撐老闆，本來咁有朝氣和凝聚力的公司，港視應該算係令港人驕傲的企業，因為可見和不可見的因素，今日卻要面對失落和無奈，可悲，到底香港想向哪裡走呢？！
鑊鏟
鑊鏟
** 博客文章文責自負,不代表本公司立場 **
