由邱禮濤執導之懸疑推理電影《暗殺風暴》定於本周五18日上畫，周四17日則假又一城溜冰場舉行大型首映禮。片方在各區展開宣傳活動，日前BabyJohn蔡瀚億和張建聲聯同「Darker」crew 分頭在各地區向市民派水派小食，與眾同樂。
《暗殺風暴》故事由一名神秘殺手「Darker」連環完美犯罪掀起序幕，古天樂、張智霖、吳鎮宇、蔡瀚億等於片內要與「Darker」鬥智鬥力，而魚蛋和檸茶是古仔角色會吃的東西，所以片方特於旺角一家小食店舉行請全港市民食魚蛋及飲凍檸茶活動，並邀請蔡瀚億聯同近30位穿上「Darker」tee的工作人員一起到場派發。其實當日早上落大雨，幸好活動舉行時天公造美，吸引大批市民排長龍打卡及捧場，令現場逼到水洩不通。由於蔡瀚億主持了飲食節目《晚吹－空肚講宵夜》4年，形象入屋，所以不少街坊一見他出現都親切地打招呼，有如老朋友傾偈一樣。
蔡瀚億坦言自己較少「掃街」食嘢：「但因為拍飲食節目關係，周圍瓹窿瓹罅搵嘢食，要搵好嘢介紹畀大家食。」不過今年他好希望以更多演員身份和觀眾見面，「其實今年完成咗半個自己嘅願望，我今年嘅願望係希望用返演員嘅身份面對觀眾，上半年拍咗一部劇集，第一次擔正，3月嘅時候有一部電影上咗，8月又有《暗殺風暴〉。我明呢4年同觀眾距離拉得好近，有時喺街見到啲市民會問『BabyJohn你食咗宵夜未呀？』，我都會諗我係咪認識佢㗎呢？希望藉住呢個距離、嚟緊用演員身份同大家見面，呢4年入面透過電影作品去同大家見面嘅機會真係少。」
今次蔡瀚億為宣傳《暗殺風暴》做了兼職小食店店長，由於天氣酷熱加上該店屬開放式，排隊市民又多，現場氣溫真係極高，工作人員個個熱到大汗淋漓，問蔡瀚億溶未？他笑言自己算幾耐熱：「我呢10年入面面對唔同嘅男演員對手，我覺得我係一係唔出汗、一係去到最尾先突然之間爆出嚟；但好多人唔係，好快已經流汗溶晒個妝，所以我係怕凍唔怕熱，如果而家係冬天，我反而有啲驚。」
至於張建聲亦於日前和超過20位「Darker」crew前往銅鑼灣街頭，向市民免費派發一萬支樽裝水，當日天氣同樣炎熱，大家在搬水時已經全身汗濕透衣衫，雖然大汗疊細汗，但張建聲依然開心，他說：「有成廿幾個helper幫手，好多公公婆婆、一家大細好踴躍去攞水。做咁多次宣傳，今次係最實際嘅一個，真係即時飲得，同埋聽到好多市民講港產片加油。嗰日大家都辛苦，最辛苦係helper，一箱箱水拖過嚟，又黑衫又笠住個頭，又曬。我會覺得非常有意義，做咗善事，又可以宣傳部電影，開心嘅。」
