相隔四年開show又唱又跳2個幾鐘 許靖韻被歌迷「迫」返酒店食外賣

許靖韻日前舉行《許靖韻情歌告白演唱會-佛山站》，原本計劃完show後要去餐廳食餐勁，想不到歌迷知道後紛紛到餐廳等她，為免引起混亂，她只好外賣回酒店食。

「小背心」許靖韻（Angela）日前舉行《許靖韻情歌告白演唱會-佛山站》，四年冇開show，令久違了的歌迷更加熱情，兩個多小時的演唱會上不停瘋狂尖叫，Angela亦相當賣力，使出渾身解數，整晚唱了二十四首歌，又以鋼琴自彈自唱，而且再度挑戰她的「強項」— 跳唱環節回饋fans。

Angela日前舉行《許靖韻情歌告白演唱會-佛山站》。

整晚唱了24首歌。

整個演唱會分為五部份，Angela表示每一部份她跟團隊都放了自己喜歡的歌曲在其中，而且亦有意思，如第一部份是Angela於今年所參加的綜藝節目中所唱過的歌；第二部份是自彈自唱、自己創作的歌曲；第三部份則是「小背心」曾翻唱過的歌；第四部份主要是演唱屬於她自己的歌。

自彈自唱。

提到演唱會上特別編排了兩part跳唱，Angela坦言是想挑戰自己，「因為有三、四年冇喺現場跳舞，今年亦都喺參與咗嘅一個節目裏面多咗跳舞，所以希望可以呈現一個有進步嘅自己俾大家睇。」她謂最難是跟dancer夾舞的時間比較少，因為show前要到美國演出，到回來便又忘記了之前排好的舞步，「我俾自己今次跳唱六十分，因為我之前嘅舞台上一路跳一路唱咁多嘅部份係比較少，有四十分係可以再進步得好啲。」

Angela為挑戰自己，特別編排了兩part跳唱。

問到演唱會的難忘事，Angela笑言是換衫部份，「我同同事之前有rehersal過換衫，係非常之匆忙，大家都係留晒汗、好緊張，因為得兩分幾鐘去換好一套衫，同埋今次啲衫都唔容易着，換衫之餘亦都要換髮型、換飾物，所以喺quick change部份我覺得係最大挑戰！」

Angela笑言換衫部份是最難忘的。

除此之外，向來為食的Angela已一早部署好完show後要去餐廳食餐勁，她更興奮得在台上開心share完show後所去的餐廳，誰不知渴望已久的願望「落空」，最後要返酒店食外賣，「當晚完show後我去到間餐廳，但發現好多歌迷已經坐咗喺度等我，應該坐咗十幾二十張枱哈哈，所以為免引起混亂、阻住舖頭做生意，最後我哋係買咗外賣返酒店食，但真係好多謝歌迷嘅支持，希望都帶到啲生意俾間舖頭啦，哈哈。」

與粉絲大合照。

許靖韻日前於廣州中山紀念堂展開巡迴音樂會，叫好叫座，全場爆滿，其全新廣東作品《望年月》亦於今日（4月18日）上架。

許靖韻（Angela）透露歌曲是於疫情時創作，「由伍卓賢作曲，周耀輝填詞。當時見到身邊好多朋友、或者朋友嘅朋友，都經歷緊一啲生離死別，所以就有咗《望年月》嘅歌詞、主題同諗法。」

Angela推出全新廣東作品《望年月》。

觀看相關影片按連結：https://youtu.be/aJtWZ1eTpus?si=ECQ-CPouDJDHa2bZ

新歌有別於Angela以往的的曲風，這次帶有小調的玩味，亦是Angela一直想嘗試的曲風。由於首次演繹小調，所以這次花了不少時間於錄音室中，Angela坦言感到困難，「首先我把聲連講嘢都係比較大聲，唱呢種曲風嘅歌係要有一種好想釋放，但係又要忍住嘅一種感覺，對於我嚟講係最難處理，所以錄音嘅過程我係好沮喪，因為覺得自己唱唔好。」後來多得合作無間的監製廖志華「導航」，「阿華好好，同佢識咗好多年，佢亦都係睇住我大，成個過程佢係好鼓勵我，冇俾到壓力我，令我成個錄音過程都可以好做到自己之餘又唱到首歌嘅感覺。」

Angela一直想嘗試小調的曲風。

不過Angela坦言這種曲風很困難，錄音的過程令她好沮喪。

除了首次演繹小調歌曲，Angela另一個獻出了另一個第一次，就是穿旗袍，「今次MV比較復古，同埋我每一個造型都會着旗袍，其實都係另外一種嘅『未試過』。」在造型上，Angela跟化型師、化妝師都經過很長時間的討論，拍MV的前一日，Angela仍然是橙金色的髮色，「然後一夜之間我哋用咗一個方法變咗而家大家見到比較深色嘅髮色，去配合返成個MV造型。同埋我哋由琴晚凌晨兩點開始到而家，已經拍咗over十二個鐘，所有工作人員及身邊團隊都非常之辛苦，所以大家真係要去睇MV呀。」

今次亦是Angela第一次穿旗袍。

為了配合造型，髮色亦由橙金色變成深色。