上篇就講咗而家嘅珠寶業真係今非昔比,之前就講細公司多,今篇就講少少大公司啦!唔好以為大公司有back up 兼support 就完全唔使理而家個市場,我地一齊睇下大行點樣今時唔同往日啦!
設計不再自由
有啲設計師朋友同我呻,而家啲老板勁麻煩!老板永遠想以最低成本去設計啲睇落好貴嘅嘢番尼!好似想cher乾佢咁,以前設計無限發揮空間,因為用尼比賽,keep住公司知名度,用咩石做咩貨都好,只要過倒工場師傅嗰關,就任佢畫,而家?要諗一啲平嘢,係最平嘅嘢,細石砌埋扮大石又有;少用石,用珠呀,寶石甚至係半寶石。
租新發展地區
以前金行係多過便利店咁滯,真係「總有一間喺左近」!而家?租約期滿之後都唔再續租喇!都明白嘅,講真幾百萬一個月,要賣幾多粒石先圍倒皮呀?點頂喎!旺區執咗咪去番啲新發展地區再開過囉!元朗屯門上水咁,雖然購買力冇旺角尖沙咀銅鑼灣咁勁,但租平咗已經係慳咗唔少,變相做sales嘅你地唔需要比你呀頭捽數都meet倒target!再講丫,雖然啲自由行少咗,但係啲新發展區都多自由行出沒,好多中港巴嗰度都有站,都算係市場策略丫!!
擺show開源
除咗轉移去新興地區開鋪節流開支之外,就要諗辦法開源喇!過往大行一般都會租五星級酒店宴會廳幾日做Private Sale,不過而家就要諗點樣可以再慳啲呢?話晒租個宴會廳幾日都要十零廿萬家嘛,答案就係去各有消費潛力嘅集團度擺show喇!銀行呀,保險公司呀咁。聽番啲朋友仔講,「牛牛」就去咗某化妝護膚水貨龍頭集團,同某三大之一嘅保險公司度做show,我覺得呢個cold call方法真係好高明,慳番啲租之餘,又可以去咁啲唔係咁好賣嘅貨,又可以收番一筆現金流,一石二鳥。
電腦系統代替人手
以前成日都講大樹好遮蔭,就算你幾做唔倒嘢,只要你冇咩犯錯,你喺大公司做其實都不錯!穩定又多福利。而家唔係喇!多個headcount就多個開支,而家喺電腦嘅世界,好多程序都可以用電腦幫手,公司就係睇中呢點,所以就請it部門設計一個system,可以代替人手嘅就代替人手,既然電腦都做得咯,咁仲要你做咩呢?咁到時咪可以有藉口炒你囉!
其實,而家唔再係奢侈珠寶嘅世界,如果唔係潘朵拉呢類銀飾又點會發圍丫!仲有啲仿鑽市場愈尼愈興起,都足以睇倒而家個市道真係愈尼愈差,真係勸各位想入珠寶業嘅絲打,你地真係要唔等錢使,冇負擔,唔使還關loan,冇咩要洗錢嘅興趣先好入行!好在焚焚除咗食之外就冇咩要使錢嘅興趣啫!好吧!今時唔同往日嘅珠寶業暫告一段落。下次再傾!
如果喜歡焚焚寫啲嘅嘢,就唔好吝嗇你地嘅like,你地嘅支持就係我嘅動力。想知多啲有關珠寶嘅嘢,可以去《焚焚的珠寶鏈尾生涯》度睇下!如有咩想問或想我寫的話,留言比我!盡量滿足大家。好吧!我地下星期一見!
PS. 文章最底有個評分架!拍爛檔幫我like 一like丫~~!!
焚焚
** 博客文章文責自負,不代表本公司立場 **