環境局日前上立法會話，香港未來好難有第三名競爭者從頭參與興建電廠，所以要引入第三名競爭者最大可能是來自內地，向內地買電有利開放電力市場。換句話說，向內地買電可開放市場，否則就繼續由兩電壟斷。
此言一出，表面誘因好大，因為有望打破壟斷，似乎只有內地資金先幫到手，環境局正在進行未來燃料組合諮詢，此時此刻發表有關言論，政府是否等同爭取支持向內地買電？
兩電作為既得利益者所提出的質疑和反對，消費者大可毋須盡信，參考下，睇下政府點回應就好。之不過，政府又有無提出過令人放心的理據？假如官員們真心認為向內地買電可開放市場，甚至增加未來與兩電談判的籌碼，這點可以理解，但最怕只係當局一廂情願，實際執行效益成疑。
開放市場，打破壟斷的最終目的係乜野？對消費者來說，是減電費及更高質素的服務。但內地供電的服務穩定性為人詬病，如何帶來競爭及進步？最終一旦斷電，市民咪又係要望兩電提供後備電源打救，兩電既得利益受損，仲要幫你補鑊，佢地會輕易就範嗎？屆時兩電討價還價的本錢不見得少。
電費方面，眾所周知潔淨能源有價，加價在所難免，但引入新的電力提供者，電費係咪會比由本地天然氣發電便宜？政府說不準，因為當中涉及建立跨境電網費用誰付，以及失去議價能力的因素，更要考慮到內地電力或要借用中電電網才可輸電予用家使用，每項成本都是充滿不確定性。
面對一大堆不確定因素，環境局唔係做足功課提供全面資料俾市民參考，反而搬出要開放電力市場就好有可能要買內地電的說法出來，繼續製造爭議。假如真是無法肯定內地供電穩定性及費用成本的話，為何不索性拉倒兩個諮詢方案，再從長計議？還望當局最後不會在一片爭議聲中硬推方案。
采俊杰
** 博客文章文責自負,不代表本公司立場 **
