經歷過劫後餘生,相信洪朝豐會更珍惜現在和將來。
58歲的前DJ洪朝豐去年罹患舌癌兼淋巴癌,要接受割脷大手術保命,除切走左邊2份1條舌頭外,還要拔左邊幾隻大牙、削去有癌細胞的牙床骨,用復修的舌頭蓋着虛位作「保護」,無論是味覺,還是捲動都只能靠右邊舌頭帶動。
失去左邊牙牀及大牙,洪朝豐進食和發音都是難題,重組的舌頭又較原來的脹大,舌頭經常伸延到牙齒外圍,所以經常咬到,含住食物時還會發出「嗒嗒聲」,但他充滿期盼說:「醫生話手術係成功嘅,冇需要修正,總之醫生話以後咀嚼到食物,但唔係睇一頭半個月,可能係幾個月甚至幾年嘅事,聽住醫生講先。之前腫瘤科醫生話,術後味蕾會錯亂,甚至冇晒味道,曾經覺得只能食流質嘢仲要無味道,生活質素好低好難接受,o依家又覺可以。」
洪朝豐指電療期間味蕾喪失甜同酸味,但近日已感覺到好小好小的甜味。問到是否意味着人生苦中帶點甜?他笑言:「唔只一點甜,係好甜,好多人對我好好,我覺得自己好幸運,前妻會同我研究唔同食譜,有好多人會送我補健品。」
劫後重生的洪朝豐及時保住命仔,但容貌、聲線及發音不復再,就連生存最基本的進食都是一個難題,他就自爆術後幾乎鯁死經歷:「憑良心講o依家唔係好想食固體嘢,因為好麻煩,我先要用門牙咬碎食物,再放去有味覺嗰邊舌頭感覺吓食物味道,然後擘大個口,用筷子將食物推入去咽喉位置生吞,過程中會咬親條脷,痛到面容扭曲成身震哂。亦試過食蝦鯁親,因為冇粥水送蝦,搞到卡住喺喉嚨,開始呼吸困難,加上當時有幾宗鯁死新聞,自己都好驚會窒息死,即刻攞杯茶大啖飲落去,鼻涕眼淚走晒出嚟,碌一聲蝦就吞咗,但之後喉嚨就好痛。」
10多年前洪朝豐曾上抑鬱狂躁症,和已故寶詠琴一段戀情令他陷入「豐狂歲月」,他笑着說:「發生咁多事,可能係上天專登揀選我,令我堅強啲,從苦難中成為別人嘅祝福,令黑暗生活嘅人得到安慰呢!但我就唔想,因為我能力有限,承受唔到咁多苦難,我唔想好似甘地、德蘭修女咁將生命來奉獻,服務大眾咁悲壯,對我嚟講太偉大,其實我想做平凡人,平平淡淡舒舒服服咁走完我剩返落嚟嘅日子。」
涅槃重生的洪朝豐直言:「我有抑鬱狂躁症,又有舌癌、有埋淋巴癌,唔好畀埋媽媽生前有嘅老人痴呆症我呀,唔該!」他還用蘇軾詞《定風波》形容自己悠然自得心境,「回首向來蕭瑟處,歸去,也無風雨也無晴。」