阿姐講嘢要聽~
應屆東華三院主席王賢誌(Vinci)上星期五於灣仔伊館舉行其任內最後一個項目──《誌友共聚》慈善音樂會,圈中人緣甚廣的他,當晚除了邀請到關淑怡、汪明荃、梁詠琪、草蜢等擔任嘉賓外,最驚喜能夠請來多年來未有在公開場合出現的李珊珊在台上分享患病的經歷。然而阿姐事後卻在社交平台寫上她當晚在台上給Vinci的一番話,卻被指有弦外之音。
一向敢言的汪明荃(阿姐)日前在社交網貼上載了她與王賢誌的合照,並寫上她在台上給王主席的一番話。阿姐表示轉眼間一年,曾講過希望對方在東華主席的崗位可以盡情發揮,今次大會邀請她出席Vinci任內最後一個大型活動,好想知道上任一年的他到底有沒有辜負大家的期望。她亦發現在對方參與過好多活動,幾乎每個月都有十幾個,可想而知相當勤力!
另外,阿姐又指出:「不過翻查報道嗰陣,我發現有四個字,總係經常出現,就係:『碌.人.情.卡』! 佢舉辦嘅活動,大部分都好似今晚咁:星光熠熠!幾乎任何藝人都請得到,令到呢一年東華嘅活動,得到坊間好多關注,而東華籌到嘅善款,亦再創新高。好多人,都會覺得你呢張人情卡真係威到盡!」阿姐不忘提醒Vinci記得要感激家族建立的慈善網絡、東華三院過百年建立的基業,還有衝鋒陷陣、捱更抵夜的東華團隊,而且做show同做慈善是一綫之差。此番話一出,就有網民留言指阿姐的說話表面看似是讚,但又好像是彈!
對於阿姐的一番說話,問到可會擔心有弦外之音,其實是在提醒他做show同做慈善只是一綫之差?Vinci接受電話訪問時力撐阿姐,認為對方只是想勉勵他:「第一她是我的前輩,而且好早叫我做慈善工作,因為我屋企的關係,可能她睇好多新聞有好多卡士有這樣安排,從而帶出她的諗法。」談到任內舉辦的活動邀得不少圈中藝人,可會為下屆接棒的主席帶來壓力?他說:「不會!始終我是一名藝人跟圈中人關係很緊密,無可能到我做主席唔搵佢哋?所以覺得都順理成章,但不同的主席都來自不同背景,接着下來的主席亦會帶不同人去東華,這樣才可以行得更快。」