又估錯數~
財爺陳茂波二月發表《財政預算案》時,預料一八至一九財政年度政府只錄得五百八十七億元盈餘,盈餘較上一年度大減,結果新一年惠民紓困措施大縮水。不過,據政府昨日公布最新數據,截至今年二月底的首十一個月,政府已有財政盈餘九百九十八億元,比財爺估計的足足多逾四百億元。
政府中人解畫,逢二、三月政府通常用錢更多,預告今年會繼續「大使」,但收入好少,條數不似表面睇咁好,但實際有多少又話唔埋。盧駿翻查資料,發現政府上年三月份開支逾四百九十億元,收入就約二百六十億元,假設今年差別不大,政府今年呢月「埋單」時盈餘又何止五百多億元?
對於盈餘可能較預算更多,民建聯陳克勤話,如果政府有錢可以考慮推更多解困措施,例如現時只發放給有需要學生的開學津貼,可改為向全港學生發放,公屋免租、電費優惠亦應考慮,財爺不應只作守財奴。工聯會黃國健認為政府應該回饋市民,不過估計「派錢每人都係雞碎咁多」,建議政府或可保留於下年度作針對性地運用。民主黨黃碧雲揶揄財爺「不嬲都估唔準,好似冇計準過」,政府應考慮加碼派錢。