金多寶說故事 第七回
《陰月陰地祭祖先 少女惹禍害一生》
睇睇下都市閒情，我講左句：「好耐冇食過白果呢樣野。」我老帽話：「唓，有咩好食？以前我地晚晚幫人揼白果，你都有份摵啦。」
將白果揼碎搣殼、去衣，做到零晨，第二朝交比鋪頭做甜品，每晚有一百蚊人工，只夠我地一餐飯，所以我地仲有其他兼職。
「係喎，果陣你咪幫人湊個小學生嘅，唔知佢而家點呢？」
我老帽忽然靜左，冇理我繼續睇報紙。
扮聾一定有景轟，於是我話：「係囉，點解湊得好地地，突然間唔見佢再黎嘅？」
我咁大聲，老帽瞄左我一眼，放低左份報紙，細細聲「嗯」左下：「個女仔呢，出左啲事。」
原來果個細路女，係大陸落黎，英文追唔上，所以十歲仲讀緊小學三年級。初初來我度好有禮貌，成日問我功課，好勤力讀書，後來我地熟左，玩到打埋交咁滯。
直到有一日，我依稀記得，老帽話個女仔嘅媽咪冇錢，唔洗我地湊佢啦，之後我地完全冇來往，老帽連提都冇再提個女仔。
「果個女仔咪响大陸出世嘅，佢成日都要番鄉下，咁啱農歷七月，佢家人見個女放暑假，咪帶埋佢番鄉下，話拜祭下祖先。」咁祭祖同七月節係冇抵觸嘅，幾時都可以祭。
「去完祭祖番黎果晚，個女仔話訓落床，一合埋眼，就見倒有個女人，對住佢笑。」
咁猛！？未訓着架喎？「係呀，合埋眼就出現，擘大眼就冇左。如是者，佢一合埋眼就見倒，嚇到唔敢訓教，佢又唔識講，衝入房揾佢媽咪，不停話有個姨姨，屋企人都唔知佢講乜。」
咁佢點訓呀？「攰得滯都要訓架，佢咪見倒個姨姨不停對住佢微笑囉！」
咁之後呢？老帽話佢媽咪都醒，估倒係番大陸祭祖時中左招，但又唔知個姨姨係咩來頭，唔知係咪唔小心整倒人地個墳，個女仔太驚，問極都講唔清楚果個係咩姨姨。
搞左十幾日，先揾倒個師傅，話個姨姨係個女仔啲祖先嘅鄰居，因為個女仔望住果位姨姨張相太耐，搞到個姨姨跟左佢番屋企。
後來佢家人帶個女仔番大陸祖先個墳場，叫佢對住果位姨姨個墳講對唔住，個女仔嚇到大喊，不停咁講對唔住對唔住，之後佢就冇再見到個姨姨，但個女仔就慘啦，有少少嚇傻左。」
「我而家講，我都驚呀。」驚咩？件事都唔係好恐怖。「個女仔住我地前面隔三條街！」
呢個位係有啲驚，隻鬼飄過黎都真係唔洗好耐。
#金多寶說故事
香港兔蘆術數學會
** 博客文章文責自負,不代表本公司立場 **