文王卦既問事,有時候遇到兩個情況,就已經知道結果
就係六合卦同六沖卦
六合,萬事俱成,即係人人期望可達到!
六沖,萬事俱破,即係你可以歸家早 d 訓覺!
小弟唔算好運,所以遇到既事都係六沖為多
但一旦遇上六合卦,又真係好難做得成功既事,去到最後點都完成到
當然以上兩種情況係最易判,但有時候係會六合化六沖同六沖化六合
先講六沖化六合,即代表住先敗而後成!
看似同事實都真係無機會,但去到最後又真係會成功!
而小弟遇得最多既係,六合化六沖,即先成而後敗
早前一段時間,小弟鐘意左一個女仔,於事就當然起番之枝卦望下咩局面
一占,可喜可賀,六合卦!即刻開心到跳舞!
當時既情況係,同該女子既關係都幾親密,每星期見面出街兩三次,又有好多共同話題,每日 message 數量都 300 幾個
但為免出意外,於是就 PM 俾師傅睇
最記得師傅第一句就講,徒弟仔,六合化六沖 wor
見到呢堆字,六合化六沖,心中突然一驚,跟住再重新判斷過,先知原來所有野都係一個假像!
如是者,去到 7 月既時候,該女子已經同個男同事一齊左,而我只係一隻兵仔.........
親身體驗過六合化六沖既卦,我不得不佩服卦像既準確性
同時間我都要檢討一下自己既大意,無睇清楚枝卦
各位判卦既時候唔好大意,太過開心就忽略左細節!
香港兔蘆術數學會
** 博客文章文責自負,不代表本公司立場 **