減澱粉勤護膚Keep靚樣 李麗珍工作為重不再恨拍拖

珍妹表示感情事一切隨緣。

「一代女神」李麗珍近年定居加拿大，沒什麽機會見到她演出，但她最近宣布回港全面復出，先為ViuTV演出處境劇《娛樂風雲》，再計劃接其他工作，珍妹笑言因囡囡許倚榕快將大學畢業可甩難。女神回歸，坦言一切以工作行先，兩年前與潘源良分手一度令她靠情緒藥度日，現在重新振作，講明不再恨拍拖，對感情事一切隨緣，選對象注重溝通。

返港定居後，珍妹打算全面復出幕前，她坦言想拍電影為主，因時間比較短，「但係都要睇吓有冇人搵。」

珍妹繼2014年拍TVB劇《女人俱樂部》後，相隔五年再拍《娛樂風雲》只因囡囡還有一年大學畢業，「好快甩難啦！我以前去開工，佢要我夜晚踏正10點半打電話畀佢講goodnight㗎！依家佢都搬出去同同學住，搬屋都識得自己打包寫清楚裏面係咩嚟，我唔使再擔心佢啦！咁我自己只做過演員一份工，所以決定返嚟拍嘢，今次拍處境劇比較輕鬆，係個好開始。」

珍妹近年為陪囡囡倚榕到加拿大升學，一直在當地生活。

珍妹最初都以為所演的角色「練月美」好似自己，因同樣是個單親息影女星，「但後期個角色為博出位變到好攻心計，呢方面就同自己好唔似啦！但係反而幾好玩，因為我好少做奸角。其實再拍戲都想試多啲唔同角色，好似扮老角咁，我只係拍張國榮音樂特輯（85年的《驚情》）扮過老角後都未試過，好想再有機會試吓。（想唔想試拍綜藝節目？）真人騷、旅遊節目都可以呀！」

劇中珍姐演息影女星「練月美」，因生下何啟華演的「杜魯福」而退出娛樂圈，所以最初兩母子關係好差。

「練月美」復出後加入娛樂公司「大天下」，為博出位可以耍手段。

珍妹同一班後輩合作相當開心，「佢哋成日教我好多新嘢，好似派心心咁。」

兩年前跟潘源良第四度分手，一度令珍妹靠情緒藥度日，去年9月潘源良跟細17年的Rita再婚，令珍妹終夢醒知緣盡，再度重新振作，不再恨拍拖，「會唔會想搵番個伴？隨緣啦！（使唔使過囡囡嗰關？）佢都咁大個都唔會反對，佢只要我開心都會支持。（有咩條件？）最緊要同我溝通到。（外形呢？）我不嬲都唔注重外表㗎啦！（有冇人追？）我又唔覺喎！但係依家都係工作為重，其他嘢唔諗住啦！」

珍妹跟潘源良多年來離離合合，兩年前潘源良以「精誠盡處非金石，眾口無權置一詞。」 結束二人關係。

96年，珍妹跟許願結婚，翌年誕下女兒許倚榕，可惜婚姻只維持了4年。

珍妹雖已屆53歲，但確實keep得好好，她自爆多年來都維持105磅，「幾年前開始喺加拿大定居，突然肥到120磅，從來未試過咁重，所以依家飲食會好節制，每日只食兩餐，早餐會食得好豐富，但會晏啲食，因為唔食午餐，晚餐會早啲食，主要係自己整，都係啲簡單家常菜，但唔食飯只食餸，每日淨係早餐食澱粉質，另外都有做健身，一星期都會做一兩次。」至於護膚方面，珍妹入行多年最注重是落妝同清潔，「聽過有人唔落妝就瞓，我絕對冇可能，都有自己做面膜，喺加拿大會自己搞掂，返香港就會搵人做，另外每次返香港都會叫媽咪整花膠補吓，但其他補品好少食，自己又唔多識整。」

年過半百的珍妹個樣仲好有少女味，她笑言：「多謝爸爸，我個樣似佢塊面圓圓哋，好似有多啲骨膠原。」

講到已22歲的囡囡倚榕，珍妹說大家似朋友相處，「佢拍拖都有同我講，依家同個香港去加拿大嘅男仔一齊，都有帶畀我見，反而依家係佢管我，佢知我呢排要開工，會怕我肥唔畀我食雪糕。」珍妹現在雖跟囡囡分隔兩地，但囡囡畢業後應該會返港發展，但一定不會做幕前，「佢自拍就得，好怕影相，就算入行都只係做啲幕後嘢。」

珍妹爆囡囡倚榕已拍拖，仲有帶埋媽咪見，網上有疑似倚榕跟男友的照片。

李麗珍曬出母女合照，兩母女更儼如姊妹獲讚無數。

一代女神李麗珍早年憑三級片《蜜桃成熟時》走紅，1996年與音樂人許愿結婚，翌年產下愛女許倚榕（Annise），可惜婚姻只維持4年便離婚，囡囡就由李麗珍獨力撫養長大，Annise愈大愈靚女，有著「翻版陳法拉」之稱，曾坦言冇興趣入行，但現任職時裝創作總監，對模特兒工作有興趣。適逢母親節將至，李麗珍曬出母女合照，兩母女更儼如姊妹獲讚無數。

一代女神李麗珍

李麗珍初出道時是「開心少女組」成員之一。

李麗珍經常自嘲又老又肥。

李麗珍跟女兒許倚榕感情要好。

網民大讚李麗珍是不老女神。

兩母女一樣咁靚！

許倚榕有「翻版陳法拉」之稱

近日兩母女為了預祝即將到來的母親節，專門拍攝一輯正式的母女靚相，二人留言：「母親節將近 ，紀錄我們第一次合影 」李麗珍身穿Oversize西裝，女兒則著住皮褸襯黑色喱士背心，兩人造型都相當型格，儼如時裝雜誌封面。獲不少網民稱讚：「珍妹，後生過你嘅都未必有你keep得咁好，勁！」、「不老女神」、「兩姊妹都咁靚」、「媽媽仲係咁靚，阿女就越大越靚」、「姊妹相多啲喎」。

兩人合照