本澳賭收連跌八個月，唔少人開始關注呢個情況，外資大行亦加埋一齊分析，花旗最新報告，下調2月本澳賭收至225億澳門元，按年大降四成。

梁司長就話賭收下跌主要受外圍綜合因素影響，包括內地資金緊缺與社會經濟變化等，博監局已準備好應對，政府在新一年財政預算亦會以嚴謹理財角度去面對問題。

除咗賭收下跌，另一個情況係陸續有貴賓廳結業，咁貴賓廳結業或整合係咪對本澳有利呢，梁司長就認為任何產業到某階段都會進入鞏固期，有整合調整屬正常，關鍵是會否對博彩業朝向健康化發展及有利邁向世界旅遊休閒中心。

從梁司長呢段話來睇，特區政府似乎對賭收連跌已有心理準備，亦不似有擔心之意。

李望風請教政圈高人，佢分析政府對賭收下滑唔應該太擔心，相反官府可能認為係一個時機，使到賭業進行自我調整。呢幾年賭收連番創新，唔少官員雖然經常苦口婆心勸博企，要考慮多元發展，增添番多一點的非博彩元素，之但係生意始終係做生意，佢地過去眼見貴賓廳都唔夠接啲大豪客，生意做唔哂，自然只向呢個方向係咁加，在商言商，佢哋亦有道理，自然唔多理官員的「勸告」，唔太肯多元化。

到依家市況出現變化，阿爺打貪打得咁厲害，大豪客減少，博企必須面對考慮轉型問題，佢哋要諗吓增加多啲的休閒渡假設施，吸引正常的中檔消費客人，高人認為其實對賭業的發展仲健康啲啦。

阿爺多次提到澳門經濟適度多元化發展，其實都係希望澳門的博彩旅游業發展健康啲，唔係齋玩一味，依家習大大打力反腐之勢唔會停，貪官再唔容易落錢出去豪賭，澳門賭收必然受影響，都應該會逼到博企重新思考吓市場定位啦。




李望風

** 博客文章文責自負,不代表本公司立場 **