青春期係咁㗎啦~
1994年亞姐季軍曹央雲與富商何永安離婚後,一直獨力湊大兩個寶貝女,眨下眼二人都踏入青春期,自然不太聽媽咪話,所以近年都經常見到曹央雲自己一個外出。直至日前,三母女終於難得「合體」落銅鑼灣行街,惜囡囡各自沉醉於手機世界,結果曹央雲出招撩二人街拍,最終得到大女「假笑」一個。
新冠肺炎肆虐,曹央雲大女Audrey於農曆新年間,因中甲型流感留院9天,搞到要冒險頻撲醫院,她都直言:「真係明知山有虎偏向虎山行,只有媽媽先會咁做。」確實,曹央雲真的好錫囡囡,就算被兩位千金Audrey和Promise無視,她都甘願承受。
日前傍晚6點,曹央雲帶同兩個女兒到利園二期Shopping,三母女難得一齊出街,她本身都笑得好開心,無奈正值反叛期的囡囡卻不太理媽咪,先是年約16歲的大女Audrey企到遠遠,一邊行一邊低頭看手機,10歲幼女Promise則塞住雙耳聽歌,大家全程零交流。
最終曹央雲諗到計撩囡囡,她一個轉身停低幫二人影靚相,豈料Promise即刻快步彈開,完全無面俾!本來Audrey都不太理,繼續向前行,但見媽咪三催四請、追住自己,結果她都好識做,企定定望住鏡頭勉強一笑;滿足了媽咪的影相癮後,囡囡又秒速打回原形,繼續臉無表情玩手機,Promise亦都跟回隊形,夾在中間跟住媽咪行。
隨後,三母女去Burberry睇衫,曹央雲即刻捉住店員打聊天,還傾到笑晒口、搭晒膊頭,鏡頭一轉,兩個寶貝女又坐埋一二邊做低頭族,最後她買了一條披肩就走人。至行到去老三陽,兩個囡囡終於「回到」現實世界,同媽咪選零食、買茶葉蛋,可惜開心的時間過得好快,曹央雲付款完又做返孤獨精!