杜德偉孖屋企人行商場 一家三口樂也融融

疫情緩和，夫妻關係亦隨之而改善。

上月中，58歲杜德偉（Alex）被本報記者發現於中環街頭跟太太李曉冰（Ice）鬧交，好在事隔一個禮拜後，兩公婆甜爆食Tea撐枱腳，一天光晒。日前下午，杜氏夫婦又十指緊扣現身又一城，可能見疫情逐漸緩和，今次仲帶埋3歲兒子Alex Junior（AJ）去揀玩具，但小朋友在玩具店兜足幾十個圈，媽咪都係唔畀囝囝「添新貨」，好彩AJ自備滑板車，踩踩吓就唔記得畀媽咪拒絕過，父母仲買Cupcake氹佢開心！望真啲，身形圓碌碌的AJ跟動畫《沖天救兵》的童子軍Russell有九成似，隔住個Mon都好想大大力搣佢塊面！

杜德偉與太太Ice十指緊扣行街，今次仲帶埋囝囝出來唞氣。

兩公婆帶AJ去買Cupcake，Ice又做醜人拒絕囝囝Encore加購。

杜德偉陪囝囝揀咗好耐玩具。

58歲杜德偉好愛錫妻兒，一唔使開工就陪家人。

杜德偉與細25歲的李曉冰於2012年結婚，並於4年後誕下金叵羅AJ，老來得子的Alex自然錫到個仔燶，只要一唔使開工就帶囝囝周圍去，好似近數月受新冠肺炎影響，取消晒幕前工作的他Stay home為自家品牌MNA設計新一季產品外，又經常抽時間陪AJ去行山、露營、摘士多啤梨，前排兩父子仲一齊製作愛心蛋糕，盡享天倫樂！最近見疫情緩和，Alex和Ice終於帶囝囝出市區，日前下午4時許，一家三口就現身又一城的玩具反斗城揀玩具。

同太太行咗去睇水槍的杜德偉仲攰到不斷拉筋。

AJ Roll褲腳化身「迷你板仔」在商場內滑來滑去。

AJ唔捨得離開蛋糕櫃，但佢都好聽媽咪話同店員揮手講Bye-Bye。

等車返屋企期間，杜德偉任得愛子周圍跑，但媽咪就要AJ乖乖哋拖番實。

「廁板」失蹤

本月中，Alex因做運動扭傷而戴上頸箍，Ice透露老公至少要戴頸箍1個月。當日Alex已棄用「BB廁板」款式，換上一個有Cyber感的輕巧護頸托，上網睇資料，該款頸托最適合低頭族及打機人士，絕對啱晒長期玩手機的他！小朋友入到玩具店必然花多眼亂，見AJ睇完一輪麵包超人玩具後，又走到另一貨架左摷右摷，可能見囝囝心大心細慢吞吞，成日忍唔住周身郁的Alex都悶到撳電話，之後仲拉埋老婆去側邊睇水槍，其間他又將雙手放在背後向後拉，舒展筋骨。

上周六見疫情逐漸緩和，杜德偉夫婦便帶埋3歲兒子AJ去又一城揀玩具。

抗疫期間，杜德偉帶了AJ去郊區摘士多啤梨解悶。

有睇開AJ的Instagram都知，去到邊食到邊的他出名是一名「為食仔」，每次見到甜品仲會開心到瞇晒眼……

好似之前入長洲有刨冰食，AJ就笑到見牙唔見眼！

迷你板仔

最後，AJ揀了一件森林家族的玩具，但媽咪叫佢放低，小朋友覺得好冇癮。離開玩具店後，兩公婆十指緊扣行到商場中心停低吹水，AJ就摺起褲腳，一個人踩住自己帶來的滑板車，在爹哋媽咪視線範圍內轆來轆去，好鬼有型。見囝囝冇收穫都冇扭計，夫婦倆也識做帶對方落樓買Cupcake作安慰，仲畀佢揸主意自己揀口味，而Ice就負責畀錢，臨走前，AJ依依不捨指住蛋糕櫃，可能仲想Encore，不過媽咪就表示：「呢個買咗喇，同姐姐拜拜啦！」AJ先乖乖拖住媽咪離開。

杜德偉透露明年出道40周年，計劃有大搞作，並希望明年能夠在香港紅館攞到期舉行周年演唱會。

杜德偉（Alex）昨晚（3月19日）應邀出席慈善活動「保單捐贈音樂會──『若然世界沒忽略2024』」，Alex繼月初TVB博愛騷後，再一次現身公開活動演唱。Alex久未在港踏上舞台，故此歌迷這晚反應非常熱烈，而Alex在台上又大方自揭年齡，跟觀眾打成一片。即將在5月台北小巨蛋舉行巡唱的Alex，當然亦被追問何時回歸主場，Alex就笑言其實每日都在香港開唱，又透露明年出道40周年，計劃有大搞作，叫觀眾拭目以待。

Alex應邀出席慈善活動。

Alex透露明年出道40周年，計劃有大搞作。

Alex這晚在台上連唱三首經典情歌包括：《擦身情緣》、《無心傷害》及《Because I love you》，而慈善演唱會的台下觀眾遍布社會各不同年齡階層，但同樣被Alex歌聲吸引，大家都聽得非常投入，掌聲不斷，演唱中途Alex又發揮幽默本色，哄得台下歌迷歡喜，他笑言這天有機會跟自己母校師弟們聚舊：「聽講今日有好多我母校聖保羅書院的師弟到場，就算有好多師弟，年紀相差應該好遠，我1978年畢業，應該好多才90後畢業吧，時間過得好快，人生好快，一轉眼由20幾歲，好奇怪就已經到60歲。」

Alex在台上連唱三首經典情歌。

演唱中途不忘發揮幽默本色，哄得台下歌迷歡喜。

難得在香港公開場合演唱，故Alex甫上台，觀眾經已歡呼拍掌，Alex接受訪問時就表示欣喜獲大會邀請：「其實今次係第一次嚟到戲曲中心表演唱歌，感覺好新鮮，今次難得有呢個緣分出席慈善活動，既然機會去到我面前，我一定會參與，全力以赴﹗」

Alex表情第一次到戲曲中心表演唱歌，感覺好新鮮。

Alex過去一年走到新加坡、上海等內地城市舉行巡唱，下一站就會是5月到台北小巨蛋，香港歌迷都敲碗想問Alex何時回歸主場開騷，他就開玩笑說到：「其實我日日都喺香港開演唱會，自己屋企沖涼嘅時候，我就會開一場，哈哈。其實我係好希望能夠喺紅館開，明年就是入行40周年，香港係我事業生命嘅開始，所以希望明年能夠喺香港紅館攞到期，作為我40周年的世界巡迴演唱會第一站。」

Alex希望明年能夠在香港紅館攞到期，作為他40周年的世界巡迴演唱會第一站。

講到日前林志穎在社交平台，上載他們二人合照，牽起網民集體回憶，Alex就指跟對方經已認識超過30年，90年代初兩人並肩工作，當年他經常去到台灣做宣傳，而林志穎就會一盡地主之誼，及後二人各有自己事業和家庭，故多年來都鮮有見面：「我哋最近喺內地嘅一個工作度見返面啦，好感動嗰個感覺，即係大家一見到面時候，大家攬住都講唔到嘢，既陌生又熟悉嘅感覺，唔係十年人事幾翻身，係二十年人事多翻身啊，大家好似無分開過，仲係當年嘅好兄弟好朋友，呢種感覺唔係成日都有。」

林志穎日前在社交平台分享與Alex的合照。

Alex指二人經已認識超過30年。

雖然多年來都鮮有見面，但一見面熟悉的感覺沒有變。